काठमाडौँ । नेपाल भारत सीमा क्षेत्रका बजारमा नक्कली चुरोट फेला परेको छ । धनुषा र पर्सामा बिहीबार आन्तरिक राजश्व कार्यालय र जिल्ला प्रशासनले गरेको बजार अनुगमनमा यस्तो फेला परेको हो ।
तस्करहरूले नेपाली चुरोट ‘खुकुरी ब्रान्ड’ को चुरोटसँग मिल्दो जुल्दो प्रकारको चुरोट बनाएर बजार बिक्री वितरण गरेको पाइएको हो ।
पर्सा र धनुषाको बजारअनुसारको क्रममा ति चुरोटहरूमा अन्तशुल्क स्टिकर समेत नक्कली टाँस गरिएको भेटिएको छ ।
‘हामी अन्त शुल्क नक्कली रहेको चुरोट बजारमा आएको भन्ने गुनासो पछि अनुगमनमा गएका थियौँ,’ एक अनुगम अधिकृतले सिधाकुरासँग भने,‘ तर, यहाँ त खुकुरी ब्रान्डको नेपाली चुरोटको हुबहु नक्कली चुरोट बनाएर बजारमा बिक्री गरेको भेटियो ।’
ति अधिकारीकाअनुसार यसरी बिक्री गरेको चुरोट नेपाली उत्पादनको भन्दा प्रतिबट्टा ३८ रुपैयाँ सस्तो रहेको भेटिएको छ । साथै ति चुरोटको बट्टामा राखिएको अन्तशुल्क स्टिकर नै नक्कली भएको पनि ति अधिकारीले बताए ।
अनुगमन सुरु गरेपछि बजार क्षेत्रका स्थानीयहरु पसल बन्द गरेर भागेका कारण ति चुरोटहरू कसरी भित्रिएको अनुसन्धान गर्न कठिन भएको अनुगमनकारी अधिकारीहरूले बताएका छन् ।
अनुगमनका क्रममा फेला परेको चुरोट भारतको पटनामा रहेको गोल्ड स्टेट टोबागोले बनाएको पाइएको छ । अवैध चुरोटका कारण राजश्वमा पुग्ने क्षतिलाई मध्यनजर गर्दै अनुगमनलाई तीब्र बनाउने पर्सा र धनुषा प्रशासन तथा आन्तरिक राजश्व कार्यालयहरूले जनाएका छन् ।
नेपालमा खुकुरी ब्रान्डको चुरोट सूर्य नेपाल प्रालीले उत्पादन गरेर बिक्री वितरण गर्छ । आफ्नो सबै भन्दा धेरै बिक्री हुने चुरोटको नक्कली उत्पादन पर्सा पूर्वका तराईका सीमा क्षेत्रका बजारमा बिक्री भइरहेको जानकारीमा आएपछि उद्योग विभागमा उजुरी गरिएको सूर्य नेपालले जनाएको छ ।
कम्पनीले आफूहरूले गरेको राजश्वको योगदानलाई मध्यनजर गर्दै अवैध चुरोट नियन्त्रणका लागि चनाखो बन्न पनि सरकारलाई आग्रह गरेको बताएको छ ।
