काठमाडौँ । नेपाल प्रिमियर लिग (एनपिएल) अन्तर्गत आज भएको ‘इलिमिनेटर’ खेलमा कर्णाली याक्सविरुद्ध चितवन राइनोजले हार व्योहोरेको छ । चितवनविरुद्ध कर्णालीले २१ रनले जीत हात पारेकाे हाे ।
कीर्तिपुरस्थित त्रिभुवन विश्वविद्यालयको क्रिकेट मैदानमा भएको खेलमा टस हारेर ब्याटिङको निम्तो पाएको कर्णालीले निर्धारित २० ओभरमा चितवन राइनोजलाई एक सय ७६ रनको लक्ष्य दिएको छ । सो लक्ष्य पछ्याएको चितवनले निर्धारित २० ओभरमा ९ विकेटको क्षतिमा १५४ रन मात्रै बनाउन सक्यो ।
कर्णालीका लागि जिसन मक्सुदले तीन, नन्दन यादवले तीन, सोमपाल कामीले दुई, विपिन प्रसाद शर्माले एक विकेट लिए ।
कर्णालीको लक्ष्य पछ्याएको चितवनका लागि रवि बोपराले सर्वाधिक ५३ रन, कुशल मल्लले २१ रन, विपिन रावलले १८ रन बनाए ।
आजको खेलमा हार व्योहोरेसँगै चितवन राइनोज एनपिएलको प्लेअफबाट बाहिरिएको छ भने कर्णाली याक्स दोस्रो क्वालिफायरमा पुगी फाइनल प्रवेशका लागि प्रतिस्पर्धा गर्न पाउने भएको छ ।
