काठमाडाैँ । राष्ट्रिय स्वतन्त्र पार्टी (रास्वपा) नेपाली कांग्रेस र नेकपा एमालेले बनाउन लागेको सरकारमा सहभागी नहुने जनाएको छ । मंगलबार सिंहदरबारमा बसेको सचिवालय बैठकले सो निर्णय गरेको पार्टीका प्रमुख सचेतक सन्तोष परियारले बताए ।
सचिवालय बैठकबाट बाहिरिने क्रममा सचेतक परियारले रास्वपा पहिलेदेखि नै स्थिरता चाहने राजनीतिक दल भएको र अस्थिरता निम्त्याउनेगरि भएको नयाँ सत्ता समिकरणमा सहभागी नहुने बताएका हुन् ।
त्यस्तै सञ्चारकर्मीसँग कुरा गर्दै परियारले दुईवटा ठूला शक्तिहरू सँगै सरकारमा रहनु लोकतान्त्रिक संस्कार नहुने टिप्पणी गरेका छन् । त्यस्तै उनले नयाँ गठबन्धनले सरकार बनाउने प्रक्रिया अगाडि बढाएपछि सरकारबार बाहिरिने बताएका छन् ।
रास्वपा प्रचण्ड नेतृत्वको सरकारमा गत फागुन २३ गते दोस्रो पटक सहभागी भएको थियो।
असार १८, २०८१ ११:३६ मा प्रकाशित
