काठमाडौँ । व्यवसायी चन्द्र ढकालको आइएमई समुहले झन्डै दुई अर्बको लगानीमा पेपर उत्पादन सुरु गरेको छ । पुस्तक छपाईमा प्रयोग हुने पेपरदेखि , फोटोकपी, ट्वाइलेट र टिस्यु पेपर समेत उत्पादन गर्ने गरि महोत्तरीको गौशाला नगरपालिका–१ रामनगरमा नेपाल पल्प एन्ड पेपर इन्डस्ट्रिज प्रालि आजबाट सञ्चालनमा आएको हो ।
ढकालका अनुसार नेपाल पल्प एन्ड पेपर इन्डस्ट्रिजले पुराना कागजलाई उपयोग गरेर सुरुवाती चरणमा दैनिक ७५ मेट्रिक टन कागज उत्पादन गर्नेछ । उद्योगबाट वार्षिक झण्डै ४० हजार मेट्रिक टन पेपर उत्पादन गर्ने लक्ष्य रहेको ढकालले बताए ।
ढकालका अनुसार उद्योगले खर, पराल, काठ लगायतका कच्चा पर्दाथ पगालेर कागज बनाउने नभई घर अफिसमा प्रयोग गरेर नष्ट गर्न फालिएका पेपर गलाएर त्यहाँबाट पिन, प्लास्टिक, मसीलगायतका अनावश्यक वस्तु छुट्याएर पुनः नयाँ पेपर बनाएर फेरी बजारमा पठाउने छ ।
ढकालले भने,'अहिलेसम्म हाम्रा घरअफिसमा प्रयोग भइसकेका त्यस्ता कागज जलाउने, खोलामा फाल्ने, फोहोरमा फाल्ने, मुसाले काट्नेआदि कारणबाट नष्ट भएका थिए ती पुनः रिसाइकलिङ भएर नयाँ कागज बन्न पाएका थिएनन । अब यस उद्योगले तिनको सदुपयोग गरी नयाँ पेपर बनाउनेछ'। उद्योगमा अहिले करिब ४ सय जनशक्ती परिचालन भएका छन् ।
