काठमाडौं । मेडिकल व्यवसायी दुर्गा प्रसाईँले मंसिर ३० गतेभित्र नागरिक सरकार घोषणा गर्ने भएका छन् । गाउँदेखि केन्द्रसम्म समानान्तर सत्ताको अभ्यास थाल्ने उनको तयारी छ । थै उनले फागुन १ गते बसन्तपुरमा दियो बालेर नेपाललाई वैदिक सनातन धर्म सापेक्ष राष्ट्र घोषणा गर्ने समेत बताएका छन् ।
यसअघि मंसिर ७ गते निर्णायक आन्दोलन घोषणा गरेका प्रसाईँले काठमाडौंको बल्खुमा आन्दोलन गरेका थिए । उक्त आन्दोलनबाट व्यवस्था परिवर्तन गर्ने घोषणा गरेका प्रसाईँले त्यसपछि पनि काठमाडौंका बिभिन्न ठाउँमा आन्दोलनका कार्याक्रमहरुलाई निरन्तरता दिदै आएका छन् । तर पछिल्ला आन्दोलनमा प्रसाईँले भनेजस्तो प्रभावकारी हुन नसकेपछि उनले फेरि अर्को आन्दोलन घोषणा गर्दै त्यसलाई निर्णायक बनाउने तयारी थालेका हुन् ।
आफ्ना आगामी आन्दोलनको जानकारी दिन उनले आइतबार पत्रकार सम्मेलन घोषणा गरेका थिए । सो क्रममा झापाको मेचीमा पूर्व राजा ज्ञानेन्द्रको हातबाट दियो बालेर महाअभियान सुरु गरेको बताउँदै फागुन १ गते पनि पूर्वराजाबाटै हिन्दु राष्ट्र घोषणा गर्ने दावी गरे ।
उनले पूर्वराजालाई समेत दरबार छोडेर जनताको आँशु पुछ्न सडकमा आउन आह्वान गरेका छन् । प्रसाईँले राष्ट्र, राष्ट्रियता, धमै संस्कृती नागरिक बचाउ अभियान का नाममा २० लाख कमको ऋण मिनाहा हुनुपर्ने माग गर्दै आएका छन् भने व्यवस्था परिवर्तन गर्ने दावी गर्दै आएका छन् ।
