बिगतका सबै सहमति सम्बोधन हुने गरि विद्यालय शिक्षा ऐन जारी गर्नुपर्ने माग राख्दै शिक्षकहरुले काठमाडौँमा प्रदर्शन गरेका छन् । छिटो भन्दा छिटो विद्यालय शिक्षा ऐन जारी गर्न दवाव दिन भन्दै नेपाल शिक्षक महासंघको नेतृत्वमा काठमाडौँमा प्रदर्शन भएको हो । शनिबार काठमाडौँको बानेश्वरबाट माइतिघरसम्म गरिएको प्रदर्शनमा देशभरका हजारौँ शिक्षकहरु सहभागी भएका थिए ।
प्रदर्शनमा सहभागीहरुले यसअघि भएका सहमति कार्यान्वयन गर, विद्यालय शिक्षा ऐन जारी गर लगाएतका नारा लगाएका हुन् । विगतका सबै सहमति सम्बोधन हुने विद्यालय शिक्षा ऐन जारी गर्नको लागि राज्यलाई दवाव दिनका लागि प्रदर्शन गरिएको शिक्षकहरुको भनाइ छ । महासंघले प्रदर्शनका लागि उपत्यकाबाहिर रहेका शिक्षकहरूलाई काठमाडौँ बोलाएको थियो । फागुन २५ गते राष्ट्रिय समितिको बैठक बस्ने र थप आन्दोलनका कार्यक्रम सार्वजनिक गर्ने महासंघले जनाएको छ ।
पहिलो चरणको आन्दोलन अन्तर्गतको अन्तिम कार्यक्रम अन्तर्गत शिक्षकहरूले माइतिघरदेखि बिजुलीबजारसम्म प्रदर्शन गरेका हुन् । आजको आन्दोलनमा महासङ्घले ७७ वटै जिल्लाहरूबाट ३६ हजार १०० जना शिक्षकहरूलाई माइतीघर मण्डलामा उतार्ने लक्ष्य राखेको थियो । आन्दोलनमा सहभागी हुनका लागि महासंघले विभिन्न समूहमा विभाजन गरेको थियो ।
यसअघि पनि विद्यालय शिक्षासम्बन्धी विधेयकमा असन्तुष्टि जनाउदै विद्यालय नै बन्द गरेर आन्दोलनमा उत्रिएपछि शिक्षकहरुसँग सरकारले सहमति गरेको थियो । तर सरकारले सहमति कार्यान्वयन नगरेको भन्दै शिक्षकहरु पुनः आन्दोलित भएका हुन् ।
