काठमाडाैँ । काँकडभिट्टाबाट खैरो हिरोइन लिएर काठमाडौँ आउने क्रममा २ जना पक्राउ परेका छन् । बिहिबार बिहान ५ ग्राम खैरो हिरोइनसहित बसमा काठमाडौँ प्रवेश गर्ने क्रममा प्रहरीले उनीहरुलाई पक्राउ गरेको हो ।
नेपाल प्रहरीको टोली तथा लागुऔषध नियन्त्रण ब्युरो, शाखा कार्यालय नागढुङ्गाको संयुक्त टोलीले चेकजाँच गर्ने क्रममा बागमती प्रदेश ०१–००६ ख ७३३६ नम्बरको यात्रुवाहक बसमा आएका सरोज अधिकारीले खैरो हिरोइन लिएर आएको अवस्थामा पक्राउ गरेको हो । उक्त बसको सिट नं १२ मा बसेका उनले प्रतिबन्धित लागुऔषध खैरो हिरोइनजस्तो देखिने ५ ग्राम वस्तु लिएर आएका थिए । जिल्ला प्रहरी परिसर काठमाडौँका प्रवक्ता नवराज अधिकारीका अनुसकार चुरोटको बट्टामा सेतो रङ्गको प्लाष्टिकमा लुकाएर ल्याएको अवस्थामा प्रहरीले उनलाई पक्राउ गरेर सोधपुछ गरेको थियो । सोधपुछका क्रममा सरोजले उक्त वस्तु लिन अरु नै आउने भनेपछि प्रहरीले फलो गर्दा दहचोकबाट भुपेन्द्र बस्नेत पक्राउ परेका छन् । उनीहरु दुवै जना मकवानपुरको थाहा नगरपालिका बस्ने प्रहरीले जनाएको छ ।
प्रहरीले उनीहरुको साथबाट २ थान मोबाइल समेत बरामद गरेको छ । उनीहरु दुवैजनालाई नियन्त्रणमा लिएर अनुसन्धान भइरहेको प्रहरीले जनाएको छ ।
