काठमाडौँ । नेपाली बजारमा सुनको मूल्यमा भारी गिरावट आएको छ । नेपाल सुनचाँदी व्यवसायी महासंघका अनुसार सोमबार सुनको मूल्य प्रतितोला १५ हजार ९०० रुपैयाँले घटेको हो ।
यसअघि ५ दिनसम्म निरन्तर बढेको सुनको मूल्यमा भारी गिरावट आएको हो । महासंघका अनुसार सोमबार छापावाल सुनको मूल्य तोलामा १ लाख ५१ हजार ३०० रुपैयाँमा कारोबार भएको छ । यो मूल्य आइतबार १ लाख ६७ हजार २०० रुपैयाँ कायम थियो ।
मंसिर ६ गते बसेको मन्त्रिपरिषद्को बैठकले सरकारले सुन र चाँदीमा लाग्दै आएको भन्सार दर घटाउने निर्णय गरेसँगै सुनको मूल्यमा उच्च गिरावट आएको हो । मन्त्रिपरिषद्को सो बैठकले यसअघि २० प्रतिशत रहेको सुनको भन्सार दर र १५ प्रतिशत रहेको चाँदीको भन्सार दर १० प्रतिशत कायम गराउने निर्णय गरेको थियो । उक्त निर्णय आजदेखि कार्यान्वयनमा आएको हो ।
त्यस्तै आज चाँदीको मूल्यमा पनि गिरावट आएको छ । सोमबार चाँदीको मूल्य प्रतितोला ९५ रुपैयाँले घटेको हो । महासंघका अनुसार आज चाँदीको मूल्य प्रतितोला १८४५ रुपैयाँ तय गरेको छ । आइतबार सो मूल्य प्रतितोला १९४० रुपैयाँ कायम थियो ।
