मकवानपुर । जिल्ला प्रहरी कार्यालय मकवानपुरले श्रोत नखुलेको १४ हजार युरो र ३२ हजार अमेरिकी डलर सहित ३ जनालाई पक्राउ गरेको छ । पक्राउ पर्नेहरुमा भारतीय नागरिक बिजय सिंह कुशवाह, प्रशान्त पाठक र राहुलकुमार माण्डावत रहेका छन् ।
उनीहरुबाट नियन्त्रणमा लिएका विदेशी मुद्राको आजको बजार भाउ अनुसार ६२ लाख ९० हजार ३५ रुपैया रहेको प्रहरीले जनाएको छ ।
हेटौंडा–१ स्थित त्रिभुवन राजपथ सडकखण्डमा काठमाडौँबाट हेटौंडातर्फ आउँदै गरेको यात्रुवाहक माइक्रो भ्यानमा यात्रारत उनीहरुबाट सो अवैध रकम फेला परेको जिल्ला प्रहरी कार्यालय मकवानपुरका प्रमुख प्रहरी उपरीक्षक विश्वराज खड्काले बताएका छन् । पक्राउ परेकाहरुलाई थप अनुसन्धान तथा कारवाहीका लागि राजश्व अनुसन्धान कार्यालय मिनभवन ललितपुर पठाइने भएको छ ।
मंसिर १०, २०८१ ११:५४ मा प्रकाशित
