काठमाडौँ । नेपाल कम्युनिष्ट पार्टी (एमाले)ले काठमाडौँ महानगरपालिकाले तोकेको १ लाख जरिवानाको पत्र बुझ्न अस्विकार गरेको छ । पत्र लिएर आज एमाले पार्टी कार्यालय पुगेको महानगरको टोलीसँग पत्र बुझ्न अस्वीकार गरिएको हो । एमाले पार्टी कार्यालयमा रहेका व्यक्तिहरुले आफूहरु उक्त कार्यक्रममको आयोजक नभएको भन्दै पत्र बुझ्न नमानेका हुन् ।
मंसिर ७ गते दरबारमार्गमा एमालेले आयोजना गरेको जागरण सभामा फोहोर गरेको भन्दै काठमाडौँ महानगरले एमालेलाई १ लाख रुपैयाँ जरिबाना गरेको हो ।
‘२०८१ मंसिर ७ गते काठमाडौँ महानगरपालिका वडा नं. १ दरबारमार्गस्थित खुल्ला सडकमा जागरण सभा गर्ने क्रममा सडक तथा सडकपेटीमा जथाभावी फोहरमैला गरी वातावरण प्रदुषण गरेकोले तपाईलाई फोहोरमैला व्यवस्थापन ऐन २०६८ र काठमाडौँ महानगरपालिकाको आर्थिक ऐन २०८१ बमोजिम रु १००००० (अक्षरुपी एक लाख) जरिबाना गरिएको व्यहोरा निर्देशानुसार अनुरोध गर्दछु ।’ महानगरले एमालेलाई काटेको पत्रमा भनिएको छ ।
