१४ असाेज, काठमाडाैँ : आइतबार पुनः काठमाडाैँका चिकित्सक र स्वास्थ्कर्मीमाथि कुटपिट भएको छ ।
आइतबार मध्यरात १ बजेतिर सिनामंगलस्थित काठमाडौं मेडिकल कलेजका चिकित्सक र स्वास्थ्कर्मीलाई कुटपिट भएको हो।
डायलाइसिस गर्न आएका बिरामी कुरुवाद्वयले डायलाइसिस गर्ने पालो ढिलो आएको भन्दै नेफ्रो विभागका ओपीडी डा. मनिष खड्कासहित इन्टर्नमा रहेकाहरुमाथि कुटपिटमा उत्रिएका हुन् । स्वास्थ्यकर्मीमाथि आक्रमण भएपछि त्यहाँका कर्मचारी आन्दोलित छन्।
उनीहरु अस्पताल परिसर र सिनामंगलस्थित सडकमा उत्रिएर धर्ना बसेका छन्। आन्दोलनका कारण अस्पताल पनि ठप्प छ।
त्यसो त स्वास्थ्यकर्मीमाथि कुटपिटमा संलग्न भएको अभियोगमा प्रहरीले दुईजनालाई पक्राउ गरिसकेको छ । पक्राउ पर्नेमा गुल्मी घर भएर काठमाडौँको चाबहिल बस्ने २२ वर्षीय रुपक गौतम र गुल्मी नै घर भएर सिनामंगल बस्ने ३४ वर्षीय सरोज गौतम रहेका छन् ।
