काठमाडौँ । काठमाडौँको सिनामंगलस्थित एक होटलमा २ युवा युवती मृत अवस्थामा फेला परेका छन् । शनिबार साँझ सिनामंगलको होटल जन्मभुमिमा कोठा भाडामा लिएर बसेका उनीहरु झुण्डिएको अवस्थामा मृत फेला परेका हुन् ।
सिनामंगलको प्रकाश सन्यास आश्रम जाने बाटोमा रहेको सो होटलमा शनिबार साँझ ६ः४५ मा पुगेर होटल भाडामा लिएर बास बसेका उनीहरु आइतबार बिहान झुण्डिएको अवस्थामा फेला परेका हुन् । होटलको १२० नम्बरको कोठा भाडामा लिएर बसेका उनीहरु आइतबार बिहान सोही कोठाको अगाडि बरन्डाको रेलिङमा सेतो रङको कपडाको सलले झुण्डिएको अवस्थामा फेला परेको जिल्ला प्रहरी परिसर काठमाडौँले जनाएको छ ।
परिसरका प्रवक्ता नवराज अधिकारीका अनुसार घटनाबारे थाहा पाउनासाथ प्रहरी पुग्दा उनीहरु मृत अवस्थामा फेला परेका हुन् । होटलको दर्ता किताबका अनुसार मृत हुनेहरुमा सुनसरी घर भएका अन्दाजी ३४ वर्षीय रमेश माझी र मोरङ घर भएकी अन्दाजी २९ वर्षीया सर्मिला कुमारी माझी रहेका छन् ।
उनीहरुको घटनाबारे जिल्ला प्रहरी परिसर काठमाडौँ र उपत्यका अपराध अनुसन्धान कार्यालयले संयुक्त अनुसन्धान गरिरहेको प्रहरीले जनाएको छ ।
