झापा : झापाको एक कार्यक्रमलाई सम्बोधन गर्न पुगेका एमाले नेता महेश बस्नेत सहभागी कार्यक्रममा उपस्थित कार्यकर्ताको दर्जन बढी गाडीहरुमा तोडफोड भएको छ । मेडिकल व्यवसायी दुर्गा प्रसाई कार्यकर्ता र पहिचानवादीको समूहले गाडीमाथि तोडफोड गरेको एमाले कार्यकर्ताको आरोप छ ।
झापाको अर्जुनधारामा भएको राष्ट्रिय युवा संघ नेपाल अर्जुनधारा नगर कमिटीको अधिवेशनमा सम्बोधन गर्न एमाले नेता महेश बस्नेत पुगेपछि कार्यक्रम चलिरहेकै बेला पार्किङ् गरेर राखिएका गाडीहरुमा तोडफोड भएको हो ।
महेश बस्नेतले भाषण सुरु गरेपछि गाडिमाथि तोडफोड गर्नुका साथै अपहरणकारी मुर्दावाद भन्दै नाराबाजी समेत गरेका थिए ।
गाडी फुटाएको आरोपमा प्रहरीले दुर्गा प्रसाईँका कार्यकर्ता विक्रम सुब्बा पक्राउ गरेको छ ।
त्यसो त गत सोमबार काठमाडौँको जमलस्थित एल्लो प्यागोडा होटलमा पत्रकार सम्मेलन गरेर बाहिरिने क्रममा मेडिकल व्यवसायी दुर्गा प्रसाईंमाथि होटल परिसरमै केही युवाको समूहले कालोमोसो दलेका थिए ।
युवाहरुले कालोमोसो दलेपछि एमाले नेता महेश बस्नेतले सामाजिक संजाल फेसबुकमा उत्तेजक अभिव्यक्ति दिएका थिए । उनले भनेका थिए, ‘बैक तथा बित्तीय संस्थालाई चुनौति दिने, विभिन्न समुदायलाई देश निकाल्छु, कालोमोसो दल्छु भन्ने आपराधीक कर्म गर्ने दुर्गा प्रसाईंलाई युवाहरुले आज तह लगाएछन् । अब सुध्रेउ, अरुलाई दोष नलगाउ । यस्तालाई सरकारले कारवाही गरोस । जनप्रतिरोध हुनु राम्रो होइन । युवा संघको तागत ननाप प्रसाईं ! ।
बस्नेतको अभिव्यक्तिपछि प्रसाईँले आफूमाथि भएको दुर्व्यवहारको बदला लिने खुलेआम चेतावनीसमेत दिएका थिए।
