काठमाडौं। सञ्चार तथा सूचना प्रविधिमन्त्री पृथ्वीसुब्बा गुरुङले फेसबुक, इन्स्टाग्रामलगायतका सामाजिक सञ्जाल नेपालमा दर्ता हुन नआए प्रतिबन्ध लगाउने बताएका छन् । सञ्चारमन्त्री गुरूङले नेपाल टेलिकमको वार्षिक उत्सवमा बोल्दै जुनसुकै सामाजिक सञ्जाल नेपालमा दर्ता नभएमा चल्न नदिने बताएका हुन् ।
फेसबुक, इन्टाग्राम, ह्वाट्सएपको सञ्चालक कम्पनी मेटालाई नेपालमा बोलाइएको तर नआएमा नेपाल चल्न नदिने बताए । उनले भने, ‘हामीसँग अहिले दर्ता भएर, प्वाइन्ट अफ कन्टयाक्ट तोकेर बसेको आज टिकटक मात्रै छ । हामीले मेटालाई बोलाइरहेका छौँ, आउँछ, की आउँदैन, हेर्न बाँकी छ । आएन भने नेपालमा चल्न दिन्नौं ।’
सञ्चारमन्त्री गुरुङले सरकारले ल्याएको सामाजिक सञ्जाल विद्येयकको प्रतिरक्षा गर्दै सामाजिक सञ्जाल अराजक बन्दै गएको र त्यसलाई नियमन गर्नुपर्ने आम नागरिकहरुकै मागका अनुसार विधेयक ल्याइएको बताए ।
उनले सामाजिक सद्भाव र धार्मिक सहिष्णुता भत्काउने अभिव्यक्ति दिने सामाजिक सञ्जाललाई कारबाही गर्नकै लागि यो विद्येयक ल्याएको बताए । उनले भने ‘हाम्रो सामाजिक सद्भाव भत्काउने, हाम्रो धार्मिक सहिष्णुता भत्काउनेलाई हामी रोक्न चाहन्छौँ, त्यसलाई हामी नियमन गर्न चाहन्छौँ । त्यसैले हामीलाई यो विधेयक चाहिएको हो ।’
