काठमाडौँ । राष्ट्रिय स्वतन्त्र पार्टीका सभापति रवि लामिछानेविरुद्ध नाराबाजी गर्न मुग्लिन पुगेको समूहलाई स्थानीयले लखेटेका छन् । आफ्नो निर्वाचन क्षेत्रमा तेस्रो सार्वजनिक सुनुवाईका लागि चितवनको इच्छाकामना गाउँपालिका पुगेका लामिछानेविरुद्ध नाराबाजी गर्न कार्यक्रमस्थल पुगेका उनीहरुले ब्यानरसहित नाराबाजी गरेका थिए ।
आफूलाई सहकारी पीडित बताउने उनीहरु युवा संघको कार्यकर्ता भएको मुग्लिनका स्थानीयको दाबी छ । एक स्थानीयका अनुसार लामिछाने कार्यक्रम सकेर भरतपुरतर्फ लाग्ने क्रममा उनीहरुले विरोधको प्रयास गरेका थिए । उनले भने, ‘भरतपुरबाट आएका केही कार्यकर्ताहरु विरोधमा उत्रिएका थिए । उनीहरुले नाराबाजी गर्न सुरु गर्नासाथ स्थानीयले लखेटे । केही बेरमै अवस्था सामान्य बन्यो । खासै ठूलो कुरो केही भएन’
आन्दोलनकर्ताहरु भागदौड गरेको भिडियो सामाजिक सञ्जालमा भाइरल छ । उक्त भिडियोमा करिब एक दर्जन मानिसहरु विरोधमा उत्रिएको देखिएको छ । रास्वपा सभापति लामिछाने भने आफ्ना थप कार्यक्रमका लागि भरतपुरतर्फ लागेका छन् ।
