काठमाडाैँ । काठमाडौँ महानगरपालिकाका मेयर बालेन शाहले कार्यपालिका सदस्यहरुलाई नगरसभामा उपस्थित हुँदा कांग्रेस, एमालेको धङधङी बोकेर नआउन आग्रह गरेका छन् । आर्थिक वर्ष २०८१/८२ का प्रस्तुत भएका वार्षिक नीति तथा कार्यक्रममाथि बोल्न चाहने सदस्यहरुलाई नाम टिपाउन समय दिएपछि कांग्रेस र एमालेका वडा सदस्यहरुले बैठक बहिस्कार गरेर बाहिरिएपछि मेयर शाहले आक्रोश पोखेका छन् ।
३ जना नेताले गर्दा १ सय ६० जनप्रतिनिधीको बोल्ने अधिकार हनन भएको बताउँदै मेयर शाहले फेसबुकमा लेखेका छन्, ‘नगरसभामा कोही पनि कुनै पार्टीको नेता र उपनेताकारुपमा रहँदैन । १६० जनाको नै हरेक निर्णयमा समान सहभागिता र स्वामित्व रहन्छ । बन्द कोठामा केही नेताले राजनीतिक लेनदेन गरेर सहमति गर्ने अनि सार्वजनिकरूपमा चै त्यसको औपचारिकता मात्रै दिने काम काठमाण्डौ महानगर पालिकाले गर्दैन ।’ उनले थपेका छन्, ‘काठमाडौँ महानगरपालिकाको नगरसभामा कांग्रेस, एमालेको धङधङी बोकेर नआउनु होला ।’
त्यस्तै उनले महानगरको कुनै पनि नीति, योजनाबारेमा छलफल बन्द कोठामा नहुने र जे भएपनि नागरिकले देखिने गरी हुने बताएका छन् ।
कार्यपालिका सदस्यहरुले बैठक बहिस्कार गरेपछि काठमाडौँ महानगरपालिको १५ औँ नगरसभाका दोस्रो बैठक असार १० गते सम्मका लागि स्थगित भएको छ ।
