१२ असोज : चीनको हाङझाउमा भइरहेको १९औं एसियाली खेलकुद अन्तर्गत इस्पोर्ट्सको पिस एलिस एसियन गेम्स भर्सन (पब्जी) मोबाइलमा नेपाली टोली सेमिफाइनल प्रवेश गरेको छ ।
आज भएको एलिमिनेसन राउन्डको समूह ‘सी’ मा दोस्रो हुँदै नेपाल सेमिफाइनलमा पुगेको हो। नेपाल रहेको समूहबाट हङकङ समूह विजेता बन्दै अन्तिम चारमा पुगेको छ। जहाँ नेपाली टिममा सुबिनकुमार प्रजापति, दिपेश गुरुङ, साहस भण्डारी र समिर गुरुङले खेलेका थिए।
वरियताका आधारमा सिधै क्वार्टरफाइनलमा स्थान बनाएको नेपालले प्यालेस्टाइनलाई हराएको थियो। नेपाल सेमिफाइनलमा प्रवेश गरेसँगै शनिबार हुने सेमिफाइनलमा दुई समूहमा चार चार टिमले प्रतिस्पर्धा गर्नेछन् । जहाँ जुन टिमले शीर्ष दुईमा स्थान बनाउँछ, त्यही टिमले फाइनलमा पुग्दै पदक जित्नेछ।
नेपाली टोलीमा टिम व्यवस्थापकमा भिक्टर पौडेल छने भने सुविन महर्जनले कप्तानीको भुमिका निभाएका छन् । त्यस्तै उक्त टिममा दीपेश गुरुङ, सागर भण्डारी, समीर गुरुङ र संगिन भट्टराई खेलाडीका रुपमा छन्।
