काठमाडाैँ । प्रशासनिक भवन निर्माणमा भ्रष्टाचार गरेको आरोप लागेका सिराहाको कर्जन्हा नगरपालिकाका पूर्वमेयर गंगा पासवानसहित ५ जना दोषी ठहर भएका छन् । अदालतको आदेशविपरित जबरजस्ती भवन बनाएको भन्दै विशेष अदालतले पूर्व मेयर पासमान, प्रमुख प्रशासकीय अधिकृत जगदीश मण्डल, निमित्त प्रमुख प्रशासकीय अधिकृत बुद्धिमान दनुवार, लेखापाल प्रवीणकुमार महतो र निर्माण कम्पनीका प्रतिनिधि बैजनाथ यादवलाई दोषी ठहर गरेको हो ।
उनीहरुले नगरपालिकाको भवन निर्माणमा अनियमितता गरेको भन्दै अख्तियार दुरुपयोग अनुसन्धान आयोगले १४ चैत २०८० मा मुद्दा दायर गरेको थियो । सो मुद्दामाथि मंगलबार र बुधबारको निरन्तरको सुनुवाइपछि उनीहरु दोषी ठहर भएका हुन् । विशेष अदालतका सदस्यहरू खुसीप्रसाद थारू, रामबहादुर थापा र मुरारीबाबु श्रेष्ठको संयुक्त इजलासले फैसला सुनाए हो ।
१ करोड ८ लाख रुपैयाँ बिगो दाबीसहित दायर गरिएको मुद्दामा जनही २१ लाख ६० हजार रुपैयाँ भराउने गरि फैसला भएको छ ।
