काठमाडौं । नेपालमा टाटाको गाडी बिक्री गर्ने आधिकारिक डिलर सिप्रदी ट्रेडिङले नयाँ भन्दै पुरानो गाडी बिक्री गर्ने गरेको खुलासा भएको छ । काठमाडौं महानगरपालिकाले आफ्नो एक खरिद प्रक्रियाबाट किनेको टिपरमाथि गरेको अनुसन्धानका क्रममा यस्तो रहस्य सार्वजनिक भएको हो ।
आयात गरेर ग्यारेजमा थन्क्याएर राखिएको पुरानो गाडी नयाँ भन्दै महानगरलाई भिडाइएको आफ्नो अनुसन्धानमा खुलेको महानगरका प्रवक्ता नवीन मानन्धरले सोमबार पत्रकार सम्मेलन गरेर जानकारी दिए ।
सिप्रदी ट्रेडिङले बिक्री गरेको ६ वटा सामान बोक्ने टिपर मध्ये चार वटा सार्वजनिक खरिद प्रक्रियाले तोकेको समय भन्दा पहिले बनेको र पुरानो भएको पाइएको मानन्धरले बताए । ‘हामीले सार्वजनिक खरिद प्रक्रिया अन्तर्गत खरिद गरेको ६ वटा मध्ये ४ वटा टिपर पुरानो र ग्यारेजमा थन्क्याएर राखेर राखिएको टिपर हामीलाई बिक्री गरेको पाइयो,’ प्रवक्ता मानन्धरले भने, ‘यो कैफियत हामीले सिप्रदीलाई पनि जानकारी गराई सकेका छौँ । उसले गल्ति स्वीकार गरेर गाडी फिर्ता लैजाने भनेको छ ।’
सिप्रदी प्रकरणमा महानगरले गरेको अनुसन्धानले नेपालमा उपभोक्ताहरू माथि भइरहेको फरक किसिमको अपराध सार्वजनिक भएको भन्दै थप छानबिन गर्न पनि महानगरले माग गरेको छ । महानगरको नयाँ खुलासासँगै सिप्रदी ट्रेडिङले बिक्री गर्ने गरेको सबै प्रकारका गाडी नयाँ हो वा पुरानो भन्नेमा आम उपभोक्तामा संशय पैदा गराएको छ ।
एक वर्ष लगाएर किनेको टिपरमा ठगिएको महानगर
आन्तरिक ढुवानीका लागि भन्दै काठमाडौं महानगरले २०८० वैशाखमा साढे २ करोड रुपैयाँ मूल्य बराबरको ६ वटा टिपर किन्ने बोलपत्र आह्वान गरेको थियो ।
महानगरका प्रमुख प्रशासकीय अधिकृत प्रदीप परियारकाअनुसार वैशाख १५ गते आह्वान गरेको बोलपत्रमा २०८० जेठ २१ गते मूल्याङ्कन गरिएको थियो भने २०८० मंसिर १० गते सिप्रदी ट्रेडिङसँग खरिद सम्झौता गरिएको थियो ।
जसअनुसार टिपरको प्रतिथान मूल्य ४१ लाख ३ हजार ९९९ रुपैयाँ कायम भएको थियो । सम्झौता भएको २ महिना पछि २०८० माघ १७ गते महानगरलाई सिप्रदीले टिपर उपलब्ध गराएको प्रशासकीय अधिकृत परियारले बताए ।
जसको कुल मूल्य २ करोड ४६ लाख २३ हजार ९९४ रुपैयाँ थियो । खरिद भएको वस्तुमा कैफियत देखिए पछि उक्त टिपरको भुक्तानी रोक्का राखिएको र अनुसन्धान अघि बढाएर महानगर अघि बढेको परियारले जानकारी दिए ।
कसरी पत्ता लाग्यो पुरानो गाडी ?
सामान्यतया शोरुमहरुले नयाँ गाडी र गाडीको ब्लु बुक उपलब्ध गराएपछि सवारी धनीहरूले गाडीको भित्री बनावटबारे खासै चासो राख्ने गरेको पाइन्न ।
गाडी बिक्रेताहरूले गाडीको मर्मत सम्भारमा आकर्षक अफरहरू पनि दिने गरेका कारण उपभोक्ताहरूले प्राविधिक विषयमा कुनै चासो राख्दैनन् । तर, काठमाडौं महानगरले भने सिप्रदीले उपलब्ध गराएको टिपरको बनेको मिति र आफ्नो बोलपत्रको मागअनुसारको तथ्य जाँच गराएको थियो । महानगरका अधिकारीहरूकाअनुसार नेपालमा यस्तो खालको परिक्षण पहिलो पटक गरिएको थियो । जसमा सिप्रदी ट्रेडिङले पुरानो अवस्थाका ४ वटा टिपर उपलब्ध गराएको खुलेको थियो ।
महानगरका प्रवक्ता नवीन मानन्धरकाअनुसार बोलपत्र दाताले उपलब्ध गराएको उपलब्ध माल सामानको परिक्षण गर्नुपर्ने खरिद सम्झौताको नियमअनुसार परिक्षणरनिरक्षण गर्दा सिप्रदीको कैफियत पत्ता लागेको हो । यस्तो पत्ता लागेबाट उपभोक्ताहरूमाथि भइरहेको ठगीको नयाँ शैली पत्ता लागेको उनले पत्रकार सम्मेलनमा जानकारी दिए ।
महानगरले सिप्रदीबाट गाडी प्राप्त गरेपछि भीआइएन नम्बर र च्यासिस नम्बर जाँच चेक गरेको प्रवक्ता मानन्धरले बताए । जसमा महानगरले प्राप्त गरेका चार वटा गाडीहरु टिपरहरु सन् २०२१ मा बनेको र २ वटा गाडीहरू २०२२ मा बनेको पाइको थियो । तर, सिप्रदी ट्रेडिङले महानगरलाई उपलब्ध गराएको टिपरहरुको बिलबुकमा ति टिपरहरु सबै सन २०२२ मा बनेको भनी उल्लेख गरेर ढाँटेको महानगरले जनाएको छ । बिलबुकमा नयाँ भन्ने तर सामान चाँही पुरानो दिने । योत सरासर झुट भयो,’ प्रवक्ता मानन्धरले सिधाकुरासँग भने,‘ ग्यारेजमा थन्किएको पुरानो सामान दिने र छली गर्ने काम गरियो ।’
सन् २०२२ मा बनेको टिपर भनेर बोलपत्रमा स्पष्ट खुलाउँदा नै सरासर महानगरलाई ढाँट गर्ने काम गरिएका कारण सिप्रदी कारबाहीको भागिदार रहेको महानगरपालिकाले जनाएको छ ।
सिप्रदी ट्रेडिङलाई ३ वर्ष कालोसूचीमा राख्न सिफारिस
यससँगै काठमाडौं महानगरले सिप्रदी ट्रेडिङलाई ३ बर्ष कालोसूचीमा राख्न सिफारिस गरेको छ । सार्वजनिक खरिद अनुगमन कार्यालयमा यस्तो सिफारिस गरिएको महानगरले जनाएको छ ।
‘सवारी साधन आपूर्ति गर्न छनोट भएको बोलपत्रदाता ट्रेडिङले सन् २०२२ मा उत्पादन भएका ६ वटा सवारी साधन उपलब्ध गराउनु पर्नेमा ४ वटा सन् २०२१ मोडेलका गाडी उपलब्ध गराएकोले उसलाई कारबाही गर्नु पर्ने देखियो,’ प्रवक्ता नवीन मानन्धरले भने,‘ अहिलेलाई कालोसूचीमा राख्न सिफारिस गरिएको छ । ’
यता सिप्रदी ट्रेडिङले भने यस विषयमा औपचारिक धारणा सार्वजनिक गर्न इन्कार गर्यो । महानगरको पत्रकार सम्मेलन पछि आन्तरिक अध्ययन भइरहेको भन्दै सिप्रदीले उपयुक्त समयमा आफ्नो धारणा सार्वजनिक गर्ने सिधाकुरालाई बतायो ।
खरिद सम्झौताविपरीतका सवारी साधन उपलब्ध गराउने सिप्रदी ट्रेडिङ्लाई कालो सूचीमा राख्न सिफारिस
सिप्रदी ट्रेडिङले नयाँ भन्दै पुरानो टिपर बिक्री गर्ने गरेको खुलासा
-
Suman karki 4 months agoलुटेरा हो सिपर्दि मैलेनी tata को गाडी चलाएको आफैले लिगेको 7/8 बर्ष भयो चित्त बुझ्न छोड्यो अब
-
Prasad rai 4 months agoTuruntai sadhaikolagi banda hune gari karwai hos.chitting
-
Bhakta Thapa 4 months agoयस खाले कान्ड रहेछ तेसैले म पनि ठगिएको छु। काठमाडौं जस्तो महानगरपालिकाललई त ठग्छ भने हामी आम नागरिकलाई के के गरेछन् होला। साला चोर डाका हरू हरू। म पनि अब मुद्दा हाल्छु। मलाई साह्रै पिडित बनाए।
-
ajay adhikari 4 months agoअरु पनि कम्पनि का बदमासि का विषय मा केहि प्रमाण पाप्त भएका छन।सो विषय मा अध्ययन टुङ्गो मा पुगे पछि कसरि राज्य र उपभोक्ता माथि बर्सौ देखि लुट को धन्दा चलिरहेको उजागर गर्नु पर्छ।
