काठमाडौँ । नेकपा एकीकृत समाजवादीका अध्यक्ष माधव कुमार नेपालले हिजो संसद विघटन गर्नेले आज पनि गर्न सक्ने भन्दै सचेत रहन प्रधानमन्त्री प्रचण्डलाई सुझाव दिएका छन् । नेकपा एकीकृत समाजवादीको १०औँ राष्ट्रिय महाधिवेशनको उद्घाटन कार्यक्रममा बोल्दै उनले प्रधानमन्त्रीलाई सुझाव दिएका हुन् ।
सो क्रममा उनले विद्रोह नगरेको भए आफुहरु पलायन वा आत्मसमर्पण गर्ने अवस्थामा पुगेको समेत उल्लेख गर्दैै अध्यक्ष नेपालले भने, ‘हिजो विघटन गरेर ठिक गरियो भन्नेले भोलि फेरि विघटन गरिदेलान् ख्याल गर्नुस् । तर अहिले संख्याका हिसाबले पनि कसैले संसद बिघटन गर्ने अवस्था आउन सक्दैन ।’
सो क्रममा अध्यक्ष नेपालले देश र जनताको आशा अपेक्षालाई पुरा गर्नका लागि दलहरु गम्भीर हुनुपर्ने बताए । उनले कम्युनिष्ट पार्टीहरु धेरै भएपनि आत्तिनुपर्ने अवस्था नरहेको भन्दै अव एकजुट हुनुपर्नेमा जोड दिए ।
समाजवादी मोर्चामा केहि समस्या देखिएपनि यसलाई नै सक्रिय गराएर एक हुनुपर्ने र प्रमुख नेताहरु जिम्मेवार हुनुपर्ने उनको भनाइ छ । उनले नेपालको कम्युनिष्ट पार्टीमा आफ्नो पार्टीले नै नेतृत्व लिएर समाजवादी क्रान्तिको कार्यक्रमलाई अघि सारेको भन्दै यसलाई अन्य कम्युनिष्ट पार्टीबीच छलफल गर्न सकिने उल्लेख गरे ।
नयाँ नेतृत्व समेत चयन हुने महाधिवेशनमा १ हजार ८ सय ४७ प्रतिनिधि सहभागी रहेको समाजवादीले जनाएको छ । एकीकृत समाजवादीले महाधिवेशनमार्फत निर्वाचित हुनका लागि २१ पदाधिकारी र केन्द्रीय कमिटीको संख्या २ सय ९९ तय गरिएको छ । समाजवादीले एक कार्यकाल पूरा गरेका केन्द्रीय सदस्यहरुले पदाधिकारीमा प्रतिस्पर्धा गर्न पाउने व्यवस्था गरेको छ । अध्यक्ष पदमा प्रतिस्पर्धा गर्न पार्टीको स्थायी कमिटीको सदस्य हुन योग्यता पुगेको व्यक्ति हुनुपर्ने, उपाध्यक्ष, उपमहासचिव र सचिव बन्नका लागि पोलिटब्युरोको सदस्य बन्न योग्यता पुगेको व्यक्ति हुनुपर्ने समाजवादीले जनाएको छ ।
