पूर्व राजा ज्ञानेन्द्र शाह पछिल्लो समय सार्वाजनिक बाक्लै देखिन थालेका छन् । सधैँ मञ्चमा आसिन हुने गरेका पूर्वराजाले बिहिबार भने भाषण नै गरे । भैरहवामा आयोजित नागरिक अभिनन्दन कार्यक्रमा उनले लामो समयदेखिको मौनता तोडेका हुन् ।
बेला बेला विज्ञप्ती सार्वजनिक गर्दै आफ्ना मनका तुष पोख्दै आएका शाहले बिहिबार भने भाषण नै गरेर देश बर्बादितर्फ गईरहेको आशय व्यक्त गरे । उनले सबै कुराको समिक्षा गरेर राम्रो मार्गचित्र कोर्नुपर्ने बताए । उनले भने, ‘देश हामीले नै बनाउने हो । हाम्रै स्रोत र साधनको परिचालन गरेर देशको समृद्धि हामीले नै अघि बढाउने हो ।’
त्यतिमात्र होइन उनले घुमाउरो पारबाट देशको वर्तमान अवस्थालाई नजिकैबाट नियालीरहेको रहेको आशय समेत व्यक्त गरेका छन् । ‘म कतै अन्त गएको छैन । सदा सदा नेपालीका साथमा छु । नेपाल भित्रै छु । नेपालीहरुको सुख, दुःख, सुबिधा, असुबिधा, बाधा पीडा, तथा हिजो आजको अवस्थालाई नजिकैबाट नियालीरहेको छु ।’ शाहले भने ।
उनले देश जरजर भएको भन्दै वेरोजगारी, गरिबी, शैक्षिक कमजोरी लगायतका कारण लाखौँ युवा विदेशिनुपरेको प्रति चिन्ता समेत व्यक्त गरे । शाहले थपे, ‘हाम्रो राष्ट्रको अस्तित्वमाथि खिया लाग्दै गएको छ । हामी झन् परनिर्भर बन्दै आफ्नो स्वतन्त्र पहिचानबाट खुम्चिदै गईहरेको छौँ ।’
पूर्वराजा शाहले मञ्बाट आफ्ना कुरा राख्न पाउँदा खुशी लागेको भन्दै आयोजकलाई धन्यवाद दिए । उनले आफ्नो फरक मूल्य मान्यता भएपनि कता कता हराइरहेको, कता कता हारिरहेको महसुस भएको समेत उल्लेख गरे । उनले मलाई आउ देश बचाउ भन्ने जनआवाज सुन्ने गरेको उल्लेख गर्दै ‘देश बनोस्, देश बचोस्’ भन्ने पुख्र्यौली भावना पोखिरहेको बताए ।
