काठमाडौं । राष्ट्रिय स्वतन्त्र पार्टीले महामन्त्री डा. मुकुल ढकाललाई पदबाट बर्खास्त गरेको छ । अब उनी पार्टीको साधारण सदस्य मात्र रहनेछन् । रास्वपाका सहप्रवक्ता मनिष झाका अनुसार आज बसेको पार्टीको केन्द्रीय समिति बैठकले महामन्त्री तथा पार्टी प्रवक्ताबाट बर्खास्त गरी साधारण सदस्य कायम गरिएको जानकारी दिए ।
आज बसेको पार्टीको केन्द्रीय समिति बैठकमा रास्वपाको अनुशासन आयोगले साधारण सदस्य समेत नरहने गरी निष्कासन गर्न सिफारिस गरेको थियो । तर केन्द्रीय समितिले साधारण रहने तर महामन्त्री र प्रवक्ताको पदबाट भने निष्कासन गरेको हो ।
ढकाललाई पार्टीले गरेको निर्णयमा चित्त नबुझे ३५ दिनभित्र पुनरावेदन समितिमा जान सक्ने बताएको छ ।
यसअघि असार २० गते बसेको केन्द्रीय समिति बैठकले महामन्त्री ढकाललाई ७ दिनका लागि निलम्बन गरेको थियो । सो बैठकले महामन्त्रीको सम्बन्धमा थप निर्णय लिन अनुशासन आयोगलाई निर्देशन दिएको थियो । र अनुशासान आयोगले प्रतिवेदन तयार गरेपछि आज केन्द्रीय समिति बैठक बोलाइएको थियो ।
