२०७७ जेठ १० गते अन्तरजातीय विवाहको विषय बनाएर जाजरकोटका नवराज विकसहित ६ जनाको हत्या गरिएको सोती घटनाको मुद्दामा आइतबारदेखि सुनुवाइ सुरु भएको छ ।
रूकुम जिल्ला अदालत (रूकुम पश्चिम) का न्यायाधीश डा. खड्कबहादुर केसीको इजलासमा आजदेखि सुनुवाइ सुरु भएको हो । पीडित अर्थात जाहेरीवालको तर्फबाट बहस गर्न वरिष्ठ अधिवक्ता दिनेश त्रिपाठी पनि रुकुम पश्चिम पुगिसकेका छन् । सुनुवाइको पहिलो दिन सरकारी वकिल र पीडित पक्षका करिव १६ बढी कानुन व्यवसायीले बहस गर्ने अदालत प्रशासनले जनाएको छ ।
२०७७ जेठ १० गते जाजरकोट २१ वर्षीय नवराज विक रुकुम पश्चिमको चौरजहारी नगरपालिका–८ सोती गाउँकी मल्ल थरकी युवतीसँग भगाएर विवाह गर्नका लागि साथीसहित पुगेका थिए ।
दलितले ठकुरीकी छोरीसँग विवाह गर्न लागेको भन्दै युवतीका परिवार र सोतीका स्थानीयले नवराजसहित उनका साथीहरूलाई लेखेटेर हत्या गरेका थिए। घटनामा १२ जना घाइते भएका थिए।
