काठमाडाैँ । सरकारले धरानको खानेपानी समस्यालाई बेवास्ता गरेको रित्तो गाग्री लिएर सिंहदरबार परिसर पुगेका धरानका मेयर हर्क साम्पाङको गाग्री प्रहरीले लिएको छ ।
सिंहदरबार नजिकै रहेको हनुमानथान मन्दिर छेवैमै गाडिबाट ओर्लिएर गाग्रीसहित सिंहदरबारतर्फ अघि बढेका उनलाई प्रहरीले रोकेको थियो । सिंहदरबार क्षेत्र निषेधित क्षेत्र रहेका कारण सो परिसरमा कुनै पनि सांकेतिक विरोध गर्न नपाइने बताएपछि साम्पाङले सो गाग्री प्रहरीको जिम्मा लगाएका छन् ।
प्रहरीले सो गाग्री आफूहरुले सुरक्षित राखिदिने र पछि जिम्मा लगाउने बताएपछि साम्पाङले सो गाग्री प्रहरीको जिम्मा लगाएका हुन् ।
साम्पाङ प्रधानमन्त्री र खानेपानी मन्त्रीलाई सो गाग्री बुझाउने भन्दै सोमबार धरानबाट काठमाडौँ आएका थिए ।
माघ ८, २०८१ ११:२२ मा प्रकाशित
