पोखरा । कास्की प्रहरीले बिनाकारण नियन्त्रण लिएको भन्दै रास्वपाका ४ जना कार्यकर्ता जिल्ला प्रहरी कार्यालय कास्कीमा अनशन सुरु गरेका छन् ।
आइतबार दिउसो जिल्ला प्रशासन कार्यालय नजिकै चिया खान बसेका आशिष थापा, प्रेम थापा, साजन शर्मा र तेजाब अर्याललाई प्रहरीले नियन्त्रणमा लिएको थियो । नियन्त्रणमा लिने क्रममा प्रहरी निरीक्षक ले रास्वपाका कार्यकर्तालाई अपशब्द बोलेको उनीहरूले बताएका छन् ।
रास्वपा सभापति रवि लामिछानेलाई म्याद थपका लागि अदालतमा बहस भैरहँदा पोखरामा रास्वपाले प्रदर्शन गरेको थियो । तर आफूहरू प्रदर्शनमा सहभागी नै नभएको अवस्थामा प्रहरीले जबरजस्ती अपशब्द प्रयोग गर्दै नियन्त्रणमा लिएको कास्की प्रहरीमा अनशनरत आशिष थापाले बताए ।
अहिले आफूहरूलाई नियन्त्रणमा लिनुको कारण र अपशब्द प्रयोग गर्ने प्रहरी निरीक्षकले माफी नमागेसम्म अनशन नतोड्ने थापाले बताए । प्रहरी कार्यालय भित्रै थापा सहित ४ जनाले अनशन सुरु गरेको रास्वपाका सहकोषाध्यक्ष दिपक बोहोराले जानकारी दिए ।
