काठमाडाैँ । राष्ट्रिय स्वतन्त्र पार्टीकी सांसद सुमना श्रेष्ठ बुधबार माइतिघर मण्डलामा प्रहरीको दमनबाट घाइते भएका सहकारी पीडितलाई भेट्न ट्रमा सेन्टर पुगेकी छिन् । बिहिबार बिहान घाइते पीडित भेट्न अस्पताल पुगेकी उनले राज्य र सरकारमा बसेकाहरुले पीडितलाई मानसिकमात्र हैन शारीरिक यातना दिन थालेको बताइन् ।
नागरिकका लागि राजनीति गर्छु भन्दै राज्य हाँक्न पुगेकाहरुले नै नागरिकलाई यातना दिएको बताउँदै उनले कसका लािग राजनीति गरेको भन्दै प्रश्न गरेकी छिन् । ‘एउटा त तपाईँहरुले उहाँहरुलाई मानिसक रुपमा थकाउन खोज्नु भयो, अब चाहीँ शारीरिक रुपमा पनि ब्रेकडाउन होस भनेर बल प्रयोग गर्नुभयो ।‘, उनले थपिन्, ‘उहाँहरुलाई ब्रेकडाउन गरेपछि तपाईँ शासकहरुले शासन गर्ने चाहीँ कसलाई ? म राज्यलाई प्रश्न सोध्न चाहान्छु, तपाईँहरु कसका लागि राजनीति गर्दै हुनुहुन्छ ?’
आफूहरुको बचत फिर्ता पाउँ भन्दै सरकार गुहार्न आएका नागरिकमाथि सरकारकै बर्बता देखिएको उनले बताइन् । ‘बचतकर्ताहरुको बचत फिर्ता पाउँ भन्ने हो उहाँहरुको माग । तपार्इँहरुले उहाँहरुसँग पटकपटक सहमति गर्नुभएको छ, तर तपाईँहरु कहिल्यै पनि त्यो सम्झौता कार्यान्वयनतर्फ जानुभएन ।’, सुमनाले भनिन् ।
अन्य प्रदर्शनकारीले मण्डला घुमेर प्रदर्शन गरेझैँ आफूहरुले पनि मण्डला घुम्न पाउनुपर्ने भन्दै अघि बढेका नागरिकमाथि राज्यसंयन्त्रले लखतरान पर्ने गरि कुटेको उनको भनाई छ ।
