काठमाडौँ : प्रदेशमा प्रहरी समायोजनको माग गर्दै सातै प्रदेशका गृहमन्त्रीहरु काठमाडौँ आएका छन् । प्रदेश सरकार मातहत रहेको प्रहरी ऐन कार्यान्वयनको माग गर्दै सरकारलाई दबाब दिन उनीहरु काठमाडौँ आएका हुन् ।
प्रदेशमा प्रहरी समायोजन नहुँदा सबै प्रदेश सरकारलाई काग गर्न धेरै समस्या परेको भन्दै काठमाडौँ आएका उनीहरुले मंगलबार प्रधानमन्त्री र उपप्रधान तथा गृहमन्त्री नारायणकाजी श्रेष्ठलाई भेटेर आफ्ना माग राख्ने कार्यक्रम रहेको बताएका छन् ।
उनीहरुले प्रधानमन्त्री र गृहमन्त्रीलाई भेटेर प्रहरी समायोजनको मागसहितको ज्ञापनपत्र बुझाउने भएका छन् । उनीहरुले दिउँसो २ बजे प्रधानमन्त्री र साढे ३ बजे उपप्रधान तथा गृहमन्त्री नारायणकाजी श्रेष्ठलाई भेटेर ज्ञापनपत्र बुझाउने भएका हुन् ।
त्यस्तै केन्द्रीय सरकारले प्रदेश सरकारको काम कारबाहीमा बाधा पुर्याइरहने हो भने आफूहरु पनि आफूहिसाब अघि बढ्ने उनीहरुले चेतावनी दिने बताएका छन् ।
मुलुक संघीय संरचनामा गएको ६ वर्ष पूरा हुँदा पनि प्रदेश प्रहरीको गठन हुन नसकेको साथै प्रहरी समायोजन ऐन २०७६ साल माघ २८ गते नै राष्ट्रपतिबाट प्रमाणीकरण भए पनि केन्द्र सरकारले कार्यान्वयनमा आनाकानी गरिरहेको उनीहरुको गुनासो छ ।
प्रहरीबिनाको प्रदेश सरकार अपूर्ण रहेको बताउँदै काठमाडौँ आएका उनीहरु प्रदेश प्रहरी नहुँदा प्रदेशको शान्ति सुरक्षा मजबुत पार्न नसकिएको बताउँछन् ।
