गण्डकी प्रदेशमा मन्त्रिपरिषद् पुनर्गठन भएको छ । मुख्यमन्त्री सुरेन्द्रराज पाण्डेले सोमबार मन्त्रिपरिषद् पुनर्गठन गरेका हुन् ।
पुनर्गठित मन्त्रीपरिषदमा दीपक मनाङे र महेन्द्रध्वज जिसी रहेका छन् । आइतबार मात्रै नेकपा एकीकृत समाजवादी पार्टी त्यागेर स्वतन्त्र हैसियत माग गरेका मनाङेलाई भौतिक पूर्वाधार तथा यातायात मन्त्रालयको जिम्मेवारी दिइएको छ भने महेन्द्रध्वज जिसीलाई सामाजिक विकास तथा स्वास्थ्य मन्त्रालयको जिम्मेवारी दिइएको छ ।
मुख्यमन्त्री पाण्डेले मन्त्रिपरिषद पुनर्गठन सम्बन्धी पत्र प्रदेश प्रमुखको कार्यालयमा पठाइसकेको र नवनियुक्त मन्त्रीको शपथ आज दिउँसो साढे तीन बजेका लागि राखिएको बताइएको छ ।
यसअघि भौतिक मन्त्रालयमा नेकपा माओवादी केन्द्रका रेशमबहादुर जुग्जाली र सामाजिक विकास मन्त्रालयमा सुशीला सिम्खडा थिइन् ।
केन्द्रमा भएका सत्ता समीकरण फेरिएपछि त्यसको प्रभाव प्रदेशमा समेत परेको थियो । जहाँ मुख्यमन्त्री पाण्डेले माओवादी मन्त्रीलाई बर्खास्त गरेर भौतिक र सामाजिक विकास मन्त्रालय आफैँसँग राखेका थिए ।
