दोलखा : दोलखामा शिकार खेल्न गएका एक युवकको बन्दुकको छर्रा लागेर मृत्यु भएको छ ।
जिल्लाको तामाकोशी गाउँपालिका–२ झुलेका २० वर्षीय सञ्जिव मिजारको भरुवा बन्दुकको छर्राले लागेर मृत्यु भएपछि प्रहरीले उनीसँगै सिकार गर्न गएका ६ जनालाई पक्राउ गरेको छ ।
पक्राउ परेका उनका साथीहरुका अनुसार मिजार आफैँले बोकेको बन्दुक आफैँ पड्किँदा उनको मृत्यु भएको बताएका छन् । छातीमा छर्रा लागेपछि तामाकोशी सामुदायिक अस्पतालमा पुर्याएर प्राथमिक उपचारपश्चात चरिकोटस्थित पशुपति चौंलागाई स्मृति अस्पताल लगिएको उनलाई अस्पताल पुर्याउनासाथ चिकित्सकले मृत घोषणा गरेका हुन् ।
उनको मृत्यु कसरी भएको हो भन्ने विषयको अनुसन्धानका लागि उनका साथी कृष्ण नेपाली, रचेस मुग्राती, सुमन तोलांगी, माधव पोख्रेल, सञ्जिव पोख्रेल र अविदित कार्कीलाई पक्राउ गरेर अनुसन्धान गरिरहेको जिल्ला प्रहरी कार्यालय दोलखाले बताएको छ ।
