काठमाडौँ । सहकारी प्रकरणमा संसदीय छानविन समिति गठन गर्नुपर्ने माग राख्दै नेपाली कांग्रेसले विरोध जनाएपछि प्रतिनिधिसभा बैठक अवरुद्ध भएको छ ।
मंगलबार बसेको बैठकको सुरुमै कांग्रेस सांसदहरु उठेर विरोध जनाएका थिए । सो क्रममा कांग्रेसकी सचेतक सुशीला थिङले प्रतिपक्षी दलले उठाएको गम्भीर विषय सम्बोधन नगरेर गलाउने रणनीति लिएको भन्दै सदनको कामकारवाही अघि बढ्न नसक्ने बताएका थिए । उनले गृहमन्त्री भएकै कारण रवि लामिछानेमाथि अनुसन्धान नभएको र छानविन समिति गठन गर्न सत्तापक्ष तयार नभएको धारणा राखे । थिङले धारणा राखेपछि सभामुख देवराज घिमिरेले रास्वपा सांसद मनिष झालाई बोल्न समय दिएका थिए । त्यसपछि कांग्रेस सांसदहरुले विरोध जनाएका थिए । बैठकमा सभामुख घिमिरेले सहज रुपमा सदनको कामकारवाही अघि बढाउन आग्रह गरेपनि विरोध कायमै रहेपछि बैठक १५ मिनेटका लागि स्थगीत गरे ।
यसअघिको बैठकमा संसदीय छानविन समिति गठनका लागि ध्यानाकर्षण गराएर बैठक सञ्चालन भएपनि मंगलबार भने कांग्रेसले कार्यसूचीमा नै प्रवेश नगरि बैठक अवरोध गरेको हो ।
