काठमाडौँ । माओवादी केन्द्रका उपाध्यक्ष एवम् प्रवक्ता अग्नि सापकोटाले वर्तमान सरकार दलाल बिचौलियाले बनाएको आरोप लगाएका छन् । शनिवार काठमाडौँमा माओवादी केन्द्रले गरेको खबरदारी सभामा बोल्दै उनले यस्तो बताएका हुन् ।
पहिलो र दोस्रो ठुलो दलबाट बनेको सरकार अरू कसैले बनाइदिएको सरकार भएको पुष्टि भएको उनको भनाई छ। ‘पहिलो र दोस्रो ठुलो दलबाट बनेको सरकार अरू कसैले बनाइदिएको सरकार भएको पुष्टि भएको छ,’ सापकोटाले भने, ‘यो सरकार बिचौलियाले बनाएको पुष्ट भएको छ । यो सरकारबाट जनताले दुःख र सास्ती मात्रै भयो ।’
माओवादी जिम्मेवार प्रतिपक्षी दल भएकाले जनताको विपत्तिमा टुलुटुलु हेरेर नबस्ने सापकोटाले बताए । सरकारकै बेवास्ता गरेका कारण देशमा बाढी र पीडितले ठुलो जनधनको क्षति भएको पनि उनले बताए । सापकोटाले सरकारलाई काठमाडौँबाट खबरदारी गर्दा नसुने आन्दोलन देशव्यापी बनाउने पनि उनले बताए ।
