संयुक्त राष्ट्रसंघका महासचिव एनटोनियो गुटेरेस र प्रधानमन्त्री प्रचण्डबीच भेट भएको छ।
संयुक्त राष्ट्र सङ्घ साथै विभिन्न अन्तर्राष्ट्रिय संस्थाहरूले आयोजना गरेको यूएईमा जारी कोप–२८ अन्तर्गत ‘सबैका लागि प्रारम्भिक चेतावनी' सम्बन्धी छलफलमा उनीहरूबीच भेट भएको हो। उक्त छलफलमा प्रधानमन्त्री प्रचण्ड अति कम विकसित राष्ट्र (एलडीसी) का अध्यक्षको रुपमा सहभागी भएका थिए।
राष्ट्रसंघको ७८औँ महासभामा भाग लिन गएको समयमा प्रचण्डको निमन्त्रणामा महासचिव गत कात्तिक २३ गते ४ दिने औपचारिक भ्रमणका लागि नेपाल आएका थिए । नेपाल भ्रमणका क्रममा उनले अन्नपूर्ण बेस क्याम्प, सगरमाथा आधारसिविर, पोखरा र लुम्बिनीको भ्रमण गर्नुका साथै संघीय संसदको दुवै सदनको संयुक्त बैठकलाई सम्बोधन समेत गरेका थिए ।
भ्रमणका क्रममा उनले प्रधानमन्त्री प्रचण्ड, राष्ट्रपति रामचन्द्र पौडेल, पूर्वप्रधानमन्त्री शेरबहादुर देउवा, केपी शर्मा ओलीसहित सभामूख, राष्ट्रिय सभाका अध्यक्षसमेतलाई भेट गरेका थिए ।
