प्रहरीले काठमाडौंको तीनकुनेबाट राष्ट्र, राष्ट्रियता, धर्म, संस्कृति र नागरिक बचाउ महाअभियानका संयोजक दुर्गा प्रसाईं समर्थकहरुलाई नियन्त्रणमा लिएको छ ।
प्रसाईंको आह्वानमा प्रदर्शन गर्न तीनकुने पुगेकाहरुलाई प्रहरीले नियन्त्रणमा लिएको हो । प्रशासनको आदेशबिपरित प्रदर्शनका लागि तीनकुने पुग्नेहरुलाई नियन्त्रणमा लिएको प्रहरीले जनाएको छ । जिल्ला प्रशासन कार्यालय काठमाडौंले दुर्गा प्रसाईंलाई तीनकुनेमा कार्यक्रम गर्न अनुमति नदिएपछि उनीहरुलाई प्रहरीले नियन्त्रणमा लिएको हो ।
बिहीबार काठमाडौंको बल्खुमा कार्यक्रम गर्न अनुमति दिएपनि तीनकुनेमा भने कार्यक्रम गर्न नदिएको जिल्ला प्रशासन कार्यालय काठमाडौंले जनाएको छ । गलत मनसायका साथ कार्यक्रम गर्नका लागि स्थानीय प्रशासनबाट उक्त स्थल प्रयोग गर्ने अनुमति प्रदान नगरिएको प्रशासनद्वारा जारी प्रेस विज्ञप्तीमा उल्लेख छ ।
शान्ति सुरक्षामा गम्भीर असर पार्ने गरि प्रचलित कानून बिपरितका गतिविधि गरे कानून बमोजिम कारवाही गरिने प्रशासनको चेतावनी छ ।
