गौर । रौतहटको गढीमाई नगरपालिका वडा नं ६ मा जिप दुर्घटना हुँदा दुई जनाको मृत्यु भएको छ । जिल्लाको देवाही गोनाही नगरपालिका धरहरीबाट जन्ती बोकेर सर्लाहीको चक्रघटा फर्किने क्रममा आज बिहान सो दुर्घटना भएको हो ।
भारतीय नम्बर एचआर ७० डी ८३८२ भएको स्कारपीयो जिप दुर्घटना हुँदा काठमाण्डौँका ५५ वर्षिय कुल बहादुर श्रेष्ठ र सर्लाही चक्रघटा ३ सुन्दरपुरकी ७ वर्षीया बालिका स्वेता पण्डितको मृत्यु भएको जिल्ला प्रहरी कार्यालय रौतहटले जनाएको छ ।
शुक्रबार बिहान ९ बजे गढीमाई नगरपालिका ६ को सिंगारमन धर्मपुर सडकखण्डको धनहरी गाँउमा सो जिप नहरबाट तल पानीमा झरेको थियो । जिपमा १२ जना सवार रहेका थिए । दुर्घटनामा घाइते भएका ३ जनालाई अस्पताल लगिएको र अन्य सकुशल रहेको जिल्ला प्रहरी कार्यालय रौतहटले जनाएको छ ।
असार २८, २०८१ ०२:०३ मा प्रकाशित
