श्रीलंकाको क्यान्डीस्थित पल्लेकेले स्टेडियममा भारत र नेपालबीच सोमबार समूह चरणको अन्तिम खेलमा भिडन्त हुँदैछ ।
उक्त खेलमा पनि वर्षा बाधक बन्ने सम्भावना देखिएको छ ।
नेपाली समयअनुसार दिउँसो सवा ३ बजेदेखि हुने उक्त खेलको समय पनि क्रिकेट स्टेडियम क्षेत्र बादलले ढाक्ने देखिएको मौसमविद्हरुले जनाएका छन् ।
मौसमविदहरुका अनुसार उक्त समयमा पानी पर्ने सम्भावना ८९ प्रतिशत रहेको छ । स्टेडियम क्षेत्रको तापक्रम २१ देखि २७ डिग्री सेल्सियससम्म रहन सक्ने देखिएको छ ।
श्रीलंकाको मौसम विभागका अनुसार सोमबार क्यान्डीमा बिहान ८ बजेदेखि नै पानी पर्ने पूर्वानुमान छ । पानी पर्ने र रहने क्रम मध्यरातिसम्म चल्न सक्नेछ ।
यसै स्टेडियममा शनिबार भएको भारत र पाकिस्तानबीचको खेल पनि मध्यराति वर्षात्का कारण रद्द भएको थियो ।
यदि सोमबार भारत र नेपाल बीच हुने खेल रद्द भएमा भारत सुपर फोरमा जाने छ । नेपालसँगको खेल रद्द भए पनि भारतको २ अंक हुनेछ ।
