काठमाडाैँ : दसैँका लागि सार्वजनिक सवारी साधनमा असोज २२ गतेबाट अग्रिम टिकट खुल्ला हुने भएको छ।
भौतिक पूर्वाधार तथा यातायात मन्त्री प्रकाश ज्वाला, यातायात व्यवस्था विभाग र यातायात व्यवसायीबीच शुक्रबार भएको छलफलले २२ असोजबाट चाडपर्व लक्षित अग्रिम टिकट बुकिङ खोल्ने निर्णय गरेको हो ।
यसअघि व्यवसायीले सडक मर्मत र भाडा बढाएपछि मात्रै अग्रिम टिकट खुलाउने बताउँदै आएका थिए तर मन्त्रीसँगको छलपछि भने पुरानै भाडा कायम गरेर दसैँका लागि अग्रिम टिकट बुकिङ खुल्ला गर्ने व्यवसायी सहमत भएका हुन् ।
त्यस्तै केही दिनयताको अविरल वर्षाका कारण बिग्रिएका सडकको मर्मत तत्काल गर्न समेत मन्त्री ज्वालाले निर्देशन दिएका छन् ।
अघिल्ला वर्षहरुमा काठमाडौं उपत्यकाबाट दसैँको समयमा करिब २० लाख यात्रु बाहिरिने गरेको तथ्यांक रहेको छ।
आश्विन १९, २०८० ०९:५३ मा प्रकाशित
