जाजरकोटको सदरमुकाम खलंगा बजारभन्दा केही माथि छ माथिल्लो थाक्ले गाउँ । जहाँ शुक्रबार राति जाजरकोटलाई केन्द्रबिन्दु बनाएर गएको भूकम्पले अधिकांश घर पूर्णरुपमा भत्किएका छन् ।
भूकम्प गएको समयमा मोबाइलमा भिडियो हेरिरहेकी थिइन् ७ वर्षीया जेनिशा बुढा । एक्कासी घर हल्लियो । पल्लो खाटमा सुतिरहेकी उनकी आमा जेनिशालाई घरबाहिर निकाल्न हत्तपत्त उठेकी मात्र के थिइन् । एक्कासी घरको गारो भत्किएर उनलाई थिच्यो ।
उनकी आमाको शरिरमाथि भत्किएकाे घरकाे इँटा थुप्रिएका कारण उनी चल्नै नसक्ने भइन् । उता जेनिशालाई समेत घरले किच्यो । भाग्यवस उनी भाटाहरुको टाँडमा परिन्, खुट्टा र शरिरका विभिन्न अंगहरुलाई घरले थिचेपनि उनको टाउको भने जोगियो ।
थिचिएर हलचल गर्सन मेत नसक्ने अवस्थामा पुगेकी उनलाई बचाउन काेही आएनन् । सबैका घर भत्किएका थिए । कतिको त मृत्यु भइसकेको थियो । सबैको रुवाबासी मच्चिएको थियो । सोही समयमा उनले आफूसँग भएको फोनले रोजगारीका लागि दुबई पुगेका उनका बाबुलाई कल गरिन् र भूकम्पले घर भत्काएर आफूहरुलाई थिचेको बताइन् ।
‘भूकम्प आउँदा हामी फिल्म हेरिरहेका थियौँ । गड्याङ्गुडुङ् गर्दै भूकम्प आयो । ममि पल्लो खाटबाट उठ्दै हुनुहुन्थ्यो । हामीलाई घरले थिचिहाल्यो ।’ उनले भनिन्, त्यसपछि मैले बाबालाई फोन गरेँर ड्याडि भूइँचालो आयो हामीलाई किच्यो भनेँ ।’
भूकम्प जानसाथ जिल्लाभरि नै नेटवर्कमा समस्या देखा पर्यो । उनले दुबईमा रहेका बाबुसँग राम्रोसँग कुरा गर्न सकिनन् । त्यसपछि गुहार माग्दै उनले खलंगा बजारमा बस्ने अंकललाई कल गरिन् । जेनिशाले कल गर्नासाथ हस्याफस्याङ गर्दै उकालो चढेका उनका अंकलले उनी र उनकी आमालाई मात्र उद्धार गरेनन् उनी आउनाले छिमेकीका धेरैले नयाँ जीवन पाए ।
