१८ भदौ, काठमाडौं । मलेसियामा जारी आईसीसी वुमन्स टी-२० विश्वकप एसिया छनोटको चौथो खेलमा नेपालले टस जितेर कतारका विरुद्ध बलिङ रोजेको छ ।
युकेएम-वाईएसडी क्रिकेट ओभल बांगीमा अहिले नेपाल र कतारको खेल रहेको छ ।
समूह ‘ए’ मा लगातार तीन खेल जितेर अपराजित रहेको नेपालले आज कतारलाई हराएमा अन्तिम खेलअघि नै सेमिफाइनल पुग्नेछ । नेपालले यसअघि मलेसिया, बहराइन र भुटानलाई पराजित गरेको थियो ।
नेपालले दुई वर्षपछि कतारसँग टी-२० क्रिकेट खेल्न लागेको हो । यसअघि २०२१ नोभेम्बरमा कतारसँग भएको तीन खेलको टी-२० सिरिज नेपालले क्लिन स्वीप नै गरेको थियो ।
नेपालले समूहको अन्तिम खेल युएईसँग बुधबार खेल्नेछ ।
भाद्र १८, २०८० ११:१९ मा प्रकाशित
