१५ भदौ, काठमाडौं । प्रधानमन्त्री पुष्पकमल दाहालले ललिता निवास जग्गा प्रकरणमा माधव नेपाललाई क्लीन चीट दिएका छन् । पोखरामा आयोजित सभामा उनले यो प्रकरणमा माधव नोपालको संलग्नता नरहेको बताएका हुन् ।
उनले सीआईबीको अनुसन्धानपछि माधव नेपाल औपचारिक रुपमा निर्दोष रहेका कुरा पुष्टि भएको बताएका हुन् ।
बालुवाटार जग्गा प्रकरणमा २९० जनालाई प्रतिवादी बनाएर जिल्ला सरकारी वकिलको कार्यालयले जिल्ला अदालत कामाडौंमा मुद्दा दर्ता गरेका छन् । जसमा ४ पूर्वमन्त्रीदेखि पूर्वसचिवसम्म छन् ।
पटक पटक भएका जग्गा अतिक्रमणमा तत्कालिन प्रधानमन्त्री माधव कुमार नेपाल र डा. बाबुराम भट्टराईको पनि संलग्नता देखिएको थियो । उनीहरुको पालामा सरकारी जग्गा व्यक्ति नाममा पुर्याउन सहयोग हुने निर्णय भएका थिए । त्यस समयमा हुँदै नभएको गुठी तथा मोही खडा गर्ने कार्य भएको थियो ।
तत्कालिन समयमा निर्णय गर्नेहरुलाई पनि अनुसन्धान गर्नु भनी सर्वोच्च अदालतले निर्देशनात्मक आदेश जारी गरेको थियो । उक्त आदेशपछि सीआईबीले पूर्व प्रधानमन्त्रीद्वयको घरमै पुगेर बयान लिएको थियो ।
तर सीआईबीले उनीहरुलाई प्रतिवादी बनाउनुपर्ने राय भने आफ्नो प्रतिवेदनमा दिएन । उक्त बयान, बयान लिएजस्तो बनाउनका लागि मात्रै लिइएको भन्दै आलोचना भईहरेको छ । सोही समयमा प्रधानमन्त्री प्रचण्डले माधव नेपाललाई क्लीन चीट दिएका छन् ।
