काठमाडाैँ । नेपालीहरुको महान चाड दसैँ नजिकै आइसकेको भए पनि उपत्यका अधिकांश मलहरुमा भने व्यापारको चहलपहल देखिएको छैन । दसैँमा नयाँ लुगा किन्ने, आफन्तहरूका लागि किनमेल गरिने भए पनि यो वर्ष भने मलहरुमा व्यापार घटेको छ ।
विगत १० वर्ष देखि सिभिल मलमा व्यापार गर्दै आएका कृष्ण राणाका अनुसार यो वर्ष पोहोरको तुलनामा २० प्रतिशत पनि व्यापार भएको छैन । मलमा मानिसहरूको चहलपहल नै नभएको ग्राहक पनि १, २ जना मात्र आउने गरेको उनले भने ।
त्यस्तै काठमाडौँ मलमा ६ वर्षदेखि व्यापार गर्दै आएका मनिस शाहीका अनुसार हरेक वर्ष व्यापार घट्दै गएको र यही अवस्था हुने हो भने विस्थापित नै हुन पर्ने अवस्था आउने उनी बताउँछन् ।
न्युरोडस्थित पिपुल प्लाजामा १३ वर्ष देखि व्यापार गर्दै आएको दीपक अधिकारीले पनि उस्तै गुनासो सुनाए । उनका अनुसार यो वर्ष ८० प्रतिशतले व्यापार घटेको छ । महङ्गी पनि उस्तै बढेका कारण मलमा चहलपहल कम भएको उनी बताउँछन् ।
