काठमाडाैँ। राप्रपाका अध्यक्षसमेत रहेका सांसद राजेन्द्र लिङ्देनले प्रतिनिधिसभा बैठकको रोष्ट्रममा पुगेर भौतिक पूर्वाधार तथा यातायात मन्त्रालयको बजेट पुस्तिका च्यातेका छन् । बैठकमा आगामी आर्थिक वर्ष २०८१/८२ को बजेटमाथि मन्त्रालयगत छलफल जारी रहँदा उनले भौतिक पूर्वाधार तथा यातायात मन्त्रालयको बजेट पुस्तिका हातमा परेपछि रिस उठेको र च्यात्न मन लागेको भन्दै रोस्ट्रममै च्यातेका हुन् ।
सांसद लिङ्देनले मन्त्रालयको बजेट पुस्तिका च्यातेर हुर्याउन मन भए पनि संसदीय मर्यादाले नदिने भन्दै च्यातेर रोष्ट्रममै राखेका छन् । ‘...जब भौतिक पूर्वाधार मन्त्रालयको बजेटको पुस्तिका हातमा पर्यो त्यो दिनदेखि म यसरी तातिएको छु कि यसरी च्यातेर हुर्याउने मन छ । (पुस्तक दुई टुक्रा पार्दै) तर, यो संसदीय मर्यादा विपरीत हुन्छ भनेर कहाँ हुर्याउनुपर्ने हो, त्यहाँ नहुर्याएर यहाँ राख्छु’, लिङ्देनले आक्रोश पोखे ।
त्यस्तै उनले भौतिक पूर्वाधार तथा यातायात मन्त्री रघुविर महासेठले बजेट बनाउँदा विधि भत्काएको र सामान्य लाजघिन समेत नराखेर राज्य स्रोतमाथि मनपरि गरेको आरोप लगाएका छन् ।
