काठमाडौँ । सहकारी प्रकरणमा पक्राउ परेका राष्ट्रिय स्वतन्त्र पार्टी (रास्वपा)का सभापति रवि लामिछानेलाई प्रहरीले आज दोस्रोपटक कास्की जिल्ला अदालतमा लैजाँदैछ । शुक्रबार पक्राउ परेका लामिछानेलाई बुधबारसम्म थुनामा राखेर अनुसन्धान गर्न दिइएको समय सकिएपछि प्रहरीले आज थप समयमा माग्न लामिछानेलाई अदालत लैजाने तयारी गरेको छ । प्रहरीले लामिछानेको बयान नसकिएको भन्दै थप समय माग गर्ने तयारी गरेको छ ।
तर प्रहरीले १२५ घण्टासम्म थुनामा राख्दा ४-५ घण्टा मात्रै बयान गरेको भन्दै रास्वपाले आपत्ती जनाएको छ। पोखरामा विहीबार बिहान पत्रकार सम्मेलन गर्दै रास्वपाका उपसभापति डा स्वर्णीम वाग्लेले बयान नसकिएको बहाना देखाएर धेरै दिन थुन्ने मनसायका साथ प्रहरीले बयानमा ढिलाई गरेको बताए ।
यस अघि बुधबार प्रहरीले दिउसो ३ बजे मात्रै बयान सुरु गरेर जम्मा ३ वटा मात्रै प्रश्नपछि आजलाई बयान सकियो भन्दै प्रहरी उठेपछि लामिछानेले बयानकक्षमा विरोध जनाएका थिए । उनले आफू बयान दिन तयार रहेको, समय पनि पर्याप्त भएकाले बयानमा सोध्नु पर्ने सबै प्रश्न सोध्न आग्रह गरेका थिए । तर प्रहरीले भने तयारी नपुगेको बहाना देखाएर बयान रोकेको थियो ।
