काठमाडौँ । नेकपा एमालेका सांसद तथा प्रतिनिधि सभाको सार्वजनिक लेखा समितिका सभापति ऋषिकेश पोखरेलकी पत्नी अञ्जला कोइरालालाई १० लाख धरौटीमा रिहा गर्न अदालतले आदेश दिएको छ ।
मोरङको उमागौरी कृषि सहकारी संस्थाको रकम अपचलनमा मुछिएकी पोखरेललाई जिल्ला अदालत माेरङका न्यायाधीश उद्धवप्रसाद भट्टराईको इजलासले रिहा गर्न आदेश दिएको हो ।
सहकारीको रकम अपचलनमा संलग्न रहेको भन्दै जिल्ला अदालत मोरङमा मुद्दा दायर भएपनि फरार रहेकी उनी बुधबार अदालतमा हाजिर भएकी थिइन् । अदालतमा हाजिर भएकी उनीसँग बयान लिएर बहस भएको र थुनछेक आदेश भएको हो ।
सार्वजनिक लेखा समितिका सभापतिकी पत्नी कोइराला मोरङ धनपालथान–४ मा रहेको उमागौरी कृषि सहकारी संस्थाको तत्कालीन सञ्चालक समिति सदस्य हुन्।
सरकारी वकिल कार्यालयले उनीसहित २६ जनाविरुद्ध सहकारीको २२ करोड ४८ लाख २७ हजार ७ सय रुपैयाँ बिगोसहित मुद्दा दर्ता गरेको थियो।
