काठमाडौँ । एफवान सफ्टबाट शङ्कास्पद चोरी भएको रकम खातामा गएको कसुरमा समातिएकालाई धरौटीमा छोड्न अदालतले आदेश दिएको छ। जिल्ला अदालत काठमाडौँले प्रहरीले पक्राउ गरेर मुद्दा बुझाएका ९ जनालाई धरौटीमा छाड्न आदेश दिएको हो।
मङ्गलबार न्यायाधीश महेन्द्रबहादुर कार्कीको इजलासले पक्राउ परेका सबैलाई धरौटीमा छाड्न आदेश दिएको हो । आदेशमा सिरहाका राहुल ठाकुर र पुरुषोत्तम साहलाई जनही ५ लाख धरौटीमा रिहा गर्न आदेश दिइएको छ।
यस्तै, उदयपुरको बेलकाका दीपक थापा मगरलाई ५० हजार रुपैयाँ, बेलका नगरपालिकाका कमल थापा मगरलाई २ लाख, सप्तरीका कृष्ण रमण राउत, सप्तरीकै सञ्जीवकुमार शर्मा, सुनसरीको धरान ८ का सन्देश राई, सुनसरीको देवानगञ्ज ५ का सागर कुमार साह र ललितपुरका त्रिगुण रत्न बज्राचार्यलाई जनही १ लाख रुपैयाँ धरौटीमा छाड्न आदेश भएको छ ।
एफवान सफ्टको युजर नाम र पासवर्डमा पहुँच पाएका व्यक्तिगत गत असोज १५ देखि १८ सम्म ३ करोड ५१ लाख रुपैयाँ चोरी भएको थियो । कम्पनीले सिटिजन्स बैंकमा खोलेको खाताबाट चार दिनसम्म रकम चोरी भएको थियो ।
जबकी उक्त खातामा जोडिएको इन्टरनेट बैङ्किङ सफ्टवेयर एफवान सफ्टले नै बनाएको थियो । आफैले बनाएको सफ्टवेयर प्रयोग गरेर साढे ३ करोड रुपैयाँ चोरीदा प्रहरीले भने एफवान सफ्टमाथि अनुसन्धान नै नगरी मुद्दा बुझाएको थियो । सो प्रकरणले एफवान सफ्टको प्रणालीको असुरक्षाका कारण बैंकहरुमा रहेको सर्वसाधारणको बैंक खाताको रकम नै असुरक्षित बनेको भन्दै चिन्ता व्यक्त भइरहेको छ ।
पुस २४, २०८१ ०९:०७ मा प्रकाशित
