१२ भदौ, काठमाडौं । प्रधानमन्त्री पुष्पकमल दाहाल ‘प्रचण्ड’ले ललितानिवास, भुटानी शरणार्थी लगायतको फाइल खोलिनु पद तथा कुर्सी जोगाउनका लागि नभएको बताएका छन् । मंगलबार संसदमा सांसदहरुले सोधेको प्रश्नको जवाफ दिने क्रममा उनले यस्तो बताएका हुन् ।
प्रश्नोत्तरका क्रममा राष्ट्रिय स्वतन्त्र पार्टीका सांसद असिम साहले ‘पद जोगाउन बिभिन्न प्रकरणको फाइल खोजस्तो गर्ने र पदमा टिकिरहहने नियत हो ?’ भनी प्रश्न गरेका थिए । उनले कांग्रेसलाई चुप गराउन भुटानी शरणार्थीको फाइल खोल्ने, समाजवादीलाई चुप गराउन वालुवाटारको फाइल खोल्ने, एमालेलाई चुप गराउन गिरिबन्धुको फाइल खोल्ने तर कारवाही भने नगरिएकोबारे प्रश्न गरेका थिए । सो क्रममा उनले फाइलको नाटक प्रधानमन्त्रीले आफ्नो कुर्सी जोगाउने अस्त्रको रुपमा प्रयोग गरेको आशय व्यक्त गरेका थिए ।
प्रधानमन्त्री प्रचण्डले त्यसको जवाफ दिदै पद र भ्रष्ट्रचारका फाइलको कुनै सम्बन्ध नभएको बताए । उनले भने ‘कसैलाई बचाउने वा अफ्ठ्यारोमा पार्ने नियतले काम गरेका छैन ।’ ‘यदि अनुसन्धानका क्रममा प्रधानमन्त्री नै आउँछ भने छोड्न आवश्यक छैन मेरो पार्टीको त के कुरा ।’
प्रधानमन्त्री प्रचण्डले भ्रष्टाचारमा संलग्न भएको तथ्य र प्रमाण भटिए कसैलाई नछोड्ने प्रतिवद्धता व्यक्त गरेका छन् ।
