काठमाडौँ । नेपाल राष्ट्र बैंकका गभर्नर महाप्रसाद अधिकारीले सम्पूर्ण बैंकिङ क्षेत्रलाई नकारात्मक असर पार्ने कामलाई बैङ्किङ्ग कसुर मान्नुपर्ने सुझाव दिएका छन् ।
सिंहदरबारमा शुक्रबार बसेको प्रतिनिधिसभा अन्तर्गतको अर्थ समिति बैठकमा बैङ्किङ्ग कसुर तथा सजाय दोस्रो संशोधन विधेयकमाथि भएको छलफलमा क्रममा उनले सो सुझाव दिएका हुन् । बैंकिङ क्षेत्रलाई नकारात्मक रुपमा प्रचारवाजी गर्दा यस क्षेत्रमा धेरै समस्याहरु देखिने गरेको भन्दै यस क्षेत्रलाई नकारात्मक असर पार्ने कामलाई समेत बैङ्किङ्ग कसुर मान्नुपर्ने उनको धारणा छ ।
केही समयअघि ऋण तिर्नु हुँदैन भन्ने प्रचारका कारण बैंकलाई अप्ठ्यारो परेको देखिएको भन्दै यस कार्यको नियन्त्रण हुने गरि कानून बन्नुपर्ने उनले बताए । अधिकारीले चेक अनादार विषय आफैँमा फौजदारी अभियोग भएकाले बैंकिङ कसुरको रुपमा परिभाषित गरिरहनु नपर्ने धारणा राखे । त्यस्तै उनले अहिलेको अवस्थामा उक्त विधेयकलाई पुनर्लेखन गर्न समेत सुझाव दिए ।
अधिकारीले बैंकिङ क्षेत्र असफल भए यसले सकै क्षेत्रमा ठूलो असर पार्ने भएकाले कानुनलाई समय सापेक्ष र बलियो बनाउनुपर्ने पनि बताए ।
