१८ असोज, काठमाडौं । चीनको हाङझाउमा जारी १९औँ एसियाली खेलकुदको क्रिकेट प्रतियोगितामा उतकृष्ठ प्रदर्शन गरेर नेपाली क्रिकेट टोली स्वदेश फर्किएको छ । नेपाली राष्ट्रिय टोलीलाई नेपाल प्रहरीले बाजा बजाएर स्वागत गरेको छ ।
नेपालले एसियाली खेलकुदमा बिभिन्न किर्तिमान राखेर विश्वको ध्यान खिच्न सफल भएको छ भने प्रशंसा समेत कमाएको छ । मंगोलियासँगको एउटै खेलमा नेपालले ७ ओटा विश्व किर्तिमान राख्न सफल भएको छ । त्यस्तै भारतीय टिमसँग क्वाटरफाइनलमा भिडेको नेपालको खेलको पनि उच्च प्रशंसा भईरहेको छ । भारतले उक्त प्रतियोगिताको लागि दोस्रो श्रेणीको टिम पठाएको थियो । तर दोश्रो श्रेणीको टिममा पनि आइपिएलमा उत्कृष्ट प्रदर्शन गरेका खेलाडीहरु थिए । भारतसँग २३ रनले पराजित भएको नेपाली टिमले आइपिएलमा जमेका खेलाडीहरुलाई कडा चुनौति दिएको थियो ।
एरपोर्टबाट निस्कने क्रममा सोचेजस्तो नतिजा ल्याउन नसकेपनि उच्च प्रदर्शन गर्न सकेकोप्रति खुशी व्यक्त गरेका छन् ।
यस्ता छन् नेपालले बनाएका किर्तिमान
उक्त प्रतियोगितामा नेपाल र मङ्गोलियाबीचको खेलमा नेपालले २७३ रनको कीर्तिमानी जित हात पारेको छ । पहिले ब्याटिङ गरेको नेपालले निर्धारित २० ओभर खेल्दै ३१४ रन बनाउने क्रममा विभिन्न कीर्तिमान कायम गरेको थियो ।
नेपालले बनाएको ३१४ रनको टी–२० अन्तर्राष्ट्रिय क्रिकेटमा हालसम्मकै सबैभन्दा उच्च योगफल हो । यसअघि यो कीर्तिमान सन् २०१९ मा अफगानिस्तानले आयरल्याण्डविरुद्ध देहरादुनमा बनाएको थयो । उक्त खेलमा अफगानिस्तानले तीन विकेटको क्षतिमा दुई सय ७८ रन बनाएको थियो ।
नेपालको विशाल योगफल बनाउने क्रममा कुशल मल्लले पनि नयाँ कीर्तिमान कायम गरे । उनी टी–२० अन्तर्राष्ट्रिय क्रिकेट प्रतियोगितामा छिटो शतक प्रहार गर्ने खेलाडी बनेका छन् । उनले ३४ बलमै शतक प्रहार गरेका थिए । कूल ५० बल खेलेका मल्लले १२ छक्का र आठ चौका प्रहार गर्दै १३७ रन बनाउँदै नटआउट रहे ।
यसै खेलमा दीपेन्द्र सिंह ऐरीले पनि सबैभन्दा छिटो अर्धशतक प्रहार गर्ने खेलाडीका रुपमा नाम लेखाएका छन् । उनले ९ बल खेल्दै ५० रन बनाएका थिए । ऐरीले पहिलो छ बलमा छ छक्का प्रहार गरेर अर्को कीर्तिमान बराबरी गरेका छन् । यसअघि युवराज सिंह, क्रिस गेल र हज्रातुल्ला जाजाइले १२ बलमा अर्धशतक प्रहार गरी कीर्तिमान कायम गरेका थिए । दीपेन्द्रले राखेको यो रेकर्ड तोड्न अन्य खेलाडीका लागि असंभवप्राय छ ।
कुशल टी–२० अन्तर्राष्ट्रिय प्रतियोगितामा सबैभन्दा कम उमेरमा शतक प्रहार गर्ने दोस्रो खेलाडी बनेका छन् । मल्ले १९ वर्ष २०६ दिनको उमेरमा शतक प्रहार गरेका हुन् । सबैभन्दा कम उमेरमा शतक प्रहार गर्ने कीर्तिमान भने गुस्तव मेक्कोनको नाममा छ ।
साथै टी२० अन्तर्राष्ट्रिय खेलमा सबैभन्दा बढी रन अन्तरले पराजित गर्ने कीर्तिमान नेपालले बनाएको छ । नेपालले मङ्गोलियालाई २७३ रनले पराजित गरेको छ । यसअघि यो कीर्तिमान चेक रिपब्लिकले राखेको थियो । चेक रिपब्लिकले पानामालाई सन् २०२१ मा २०८ रनले पराजित गरेको थियो ।
उक्त खेलमा अर्धशतक प्रहार गरेका दीपेन्द्र सिंह ऐरीले स्ट्राइक रेटमा पनि नयाँ कीर्तिमान कायम गरेका छन् । उनले १० बलमा ५२ रन प्रहार गर्दै ५२० को स्ट्राइक रेट बनाएका छन् । दश बलभन्दा बढी खेल्ने कुनै पनि खेलाडीले हालसम्म ५०० भन्दा बढीको स्ट्राइक रेटमा रन बनाएका छैनन् । यसअघि सन् २०१६ मा जिम्बाबेको घरेलु टी–२० प्रतियोगितामा माल्क्लोम वालरले ४३० को स्ट्राइक रेटमा रन बनाएका थिए ।
नेपालले मङ्गोलियाविरुद्ध प्रहार गरेको २६ वटा छक्काले पनि नयाँ कीर्तिमान कायम गरेको छ । यसअघि सन् २०१९मा अफगानिस्तानले आयरल्याण्डविरुद्ध, यसै वर्षको सुरुवातमा वेस्ट इन्डिजले दक्षिण अफ्रिकाविरुद्ध २२ वटा छक्का प्रहार गरेको थियो ।
