विराटनगर : कोशी प्रदेशको मुख्यमन्त्रीका लागि नेकपा माओवादी केन्द्रका इन्द्रबहादुर आङ्बो र नेपाली कांग्रेसका केदार कार्कीले प्रदेश प्रमुख परशुराम खापुङ्गकोमा पुगेर दाबी पेश गरेका छन् ।
आङ्बोलाई नेपाली कांग्रेसका देउवा पक्ष सहित एकीकृत समाजवादी र जनता समाजवादी पार्टीको समर्थन रहेको दाबी गरेका छन् भने कार्कीले नेकपा एमालेको समर्थन सहित नेपाली कांग्रेसका शेखर कोइराला समुहको समर्थन रहेको दाबी गरेका छन् ।
आङ्बोलाई संघीय सरकारको सत्ता गठबन्धनले उम्मेदवार बनाउने निर्णयनै गरेको थियो ।
यता कार्कीले भने कांग्रेसका ९ सांसद सहित एमालेका ३९ सांसदको भोट आफ्नो पक्ष रहेको दाबी गरेका छन् ।
कार्कीसँगै एमाले प्रमुख सचेतक रेवतीरमण भण्डारी लगायतका सांसदहरु पनि प्रदेश प्रमुख कहाँ पुगेका छन् । उपसभामुखसहित एमालेका ४० सांसद छन् ।
९३ सदस्यीय कोशी प्रदेश सभामा बहुमतका लागि ४७ सांसद आवश्यक हुन्छ । संविधानको धारा १६८ को उपधारा ५ बमोजिम सरकार गठनका लागि हस्ताक्षर गर्दा सांसदलाई ह्वीप नलाग्ने र स्वतन्त्र हैसियत रहने सर्वोच्च अदालतको व्याख्या छ ।
