तिनकुनेमा प्रशासनले प्रदर्शन गर्न अनुमति नदिएपछि दुर्गा प्रसाईँ नेतृत्वको समूहले भक्तपुरको सानोठिमीमा प्रदर्शन गरेका छन् ।
बिहिबार बल्खु क्षेत्रमा प्रदर्शनमा उत्रिएका उनीहरुले शुक्रबारदेखि निरन्तर काठमाडौँको तिनकुनेमा शक्ति प्रदर्शन गर्ने बताएका थिए । तर जिल्ला प्रशासन कार्यालय काठमाडौँले शुक्रबार एक विज्ञप्ती जारी गर्दै प्रसाईँ समूहलाई तिनकुनेमा प्रदर्शन गर्न अनुमति नदिइएको साथै जबरजस्ती प्रदर्शनमा उत्रिए कारबाही गर्ने चेतावनी दिएको थियो ।
प्रशासनको उक्त विज्ञप्तीपश्चात तिनकुनेमा प्रदर्शनका लागि पुगेका प्रसाईँ समर्थकलाई प्रहरीले धमाधम नियन्त्रणमा लिइरहेको छ । यतिसम्म कि उक्त क्षेत्र भएर हिँड्ने सर्वसाधारणलाई समेत प्रहरीले पक्राउ गरेको छ ।
तिनकुनेमा प्रदर्शन गर्न नदिएपछि उनीहरु सानोठिमी पुगेर प्रदर्शन गरिरहेका छन् । उनीहरु कमेरोटारस्थित मुख्य सडकमा प्रदर्शन गरिरहेका छन् । जसका कारण पूरानो ठिमी हुँदै भक्तपुर जाने सडक अवरुद्ध भएको छ ।
