काठमाडौँ । सरकारले दशैँ, तिहार, छठलगायत ठूला चाडपर्वमा सहुलियत दरमा दैनिक उपभोग्य वस्तु उपलब्ध गराउने उद्देश्यले देशभर सुपथ मूल्य पसल सञ्चालन गरेको छ ।
सरकारी स्वामित्वका खाद्य व्यवस्था तथा व्यापार कम्पनी, साल्ट्र ट्रेडिङ तथा दुग्ध विकास संस्थानले बिहीबारदेखि देशभर सुपथ मूल्य पसल सञ्चालन गरेको हो । सुपथ मूल्य पसलको खाद्य व्यवस्था तथा व्यापार कम्पनी काठमाडौंमा उद्योग, वाणिज्य तथा आपूर्तिमन्त्री दामोदर भण्डारीले उद्घाटन गरे ।
सो क्रममा मन्त्री भण्डारीले अत्यावश्यक बस्तुहरुमा न्यूनतम पाँच रुपैया छुट दिएर सुपथ मूल्य पसल सञ्चालमा ल्याइएको बताए । चाडपर्वका बेला अत्यावश्यक वस्तुको सहज उपलव्धता र सहुलियत दिने सरकारको सय दिन भित्रको महत्वपूर्ण कार्यक्रमलाई निरन्तरता दिने उनले बताए ।
चाडबाडको समयमा उपभोक्ता बजारमा निजी क्षेत्रको एकाधिकार हुन नदिन भन्दै सरकारले हरेक वर्ष सुपथ मूल्य पसल सञ्चालन गर्दै आएको छ । उपत्यका लगायत देशभरका बिभिन्न स्थानमा सुपथ मूल्य पसल सञ्चालन गरिएको खाद्य व्यवस्था तथा व्यापार कम्पनीले जनाएको छ । सुपथ मूल्य पसलबाट चामल, दालमा ५ रुपैया, तेल गेडागुडी, पिठो, मैदा, चिउरा चिनी क्वाटीमा रु ७ रुपैया, डि.डि.सी. घ्यूमा प्रतिकेजी १० रुपैयाँ छुट दिइएको छ । कम्पनीले आगामी माघ २ गतेसम्म ४२ जिल्लाका ६३ स्थानमा सुपथ मूल्य पसल सञ्चालन गर्ने जनाएको छ ।
